Biden, turne në Europë me “peshën” e dy luftërave

Presidenti amerikan Joe Biden mbërriti sot në Francë për të përkujtuar 80-vjetorin e zbarkimit të forcave aleate në Normandi në Luftën e Dytë Botërore. Ai u prit në aeroportin Orly në Paris nga kryeministri francez Gabriel Atal .

Gjatë vizitës së tij zyrtare pesë-ditore në vend, e para që nga marrja e detyrës në Shtëpinë e Bardhë, ai do të përpiqet të nënvizojë angazhimin e Shteteve të Bashkuara për të mbështetur aleatët në Europë.

Ai do të takohet me presidentin francez Emmanuel Macron, si dhe me presidentin ukrainas Volodymyr Zelenky.

Me turneun e tij europian, Biden do të përpiqet të mbushë terrenin e humbur në fushën e tij dikur të privilegjuar të politikës së jashtme, pasi kritikët e tij e fajësojnë atë për humbjet e fundit të Kievit kundër Moskës në luftën në Ukrainë dhe për ngërçin e krizës në Lindjen e Mesme dhe Gaza.

Gjatë fushatës së tij zgjedhore 2020, ai kishte premtuar të rivendoste aleancat ndërkombëtare të SHBA-së, si dhe rolin udhëheqës të Uashingtonit në arenën politike globale.

Megjithatë, politika e tij e jashtme, e cila shërbeu si një kundërpeshë ndaj izolacionizmit “America First” të Donald Trump po shfaqet si një “peshë” për fushatën e tij katër vjet më vonë, sipas një analize nga Elena Snyder, Eli Stokols dhe Lisa Kaczynski në Politiko.

Muaji i takimeve ndërkombëtare, i cili fillon me një vizitë në Francë, shihet si një rrezik i lartë politik pasi luftërat binjake në Ukrainë dhe Gaza kanë “tronditur” pozicionin e tij dhe kanë gërryer popullaritetin e tij brenda vendit në SHBA, sipas sondazheve.

Ndjenja e kaosit global përpara zgjedhjeve presidenciale të nëntorit është në kontrast të plotë me mesazhin e kandidaturës së tij për vitin 2020, kur ai premtoi të rivendoste imazhin e Amerikës jashtë vendit dhe ta kthente vendin në normalitet.

Biden mori një goditje, nga e cila nuk u shërua kurrë, pas tërheqjes së dështuar të trupave amerikane nga Afganistani në verën e vitit 2021 dhe vdekjes së 13 ushtarakëve amerikanë në një sulm vetëvrasës.

Që atëherë, politika e jashtme e presidentit amerikan nuk ka shënuar suksese të rëndësishme, të cilat do të përmirësonin pamjen e përgjithshme.

Mbrojtësit e politikës së tij pohojnë se ai ndihmoi në forcimin e unitetit të aleatëve të NATO-s pas pushtimit rus të Ukrainës në shkurt të vitit 2022 dhe kujtojnë se ai “i shtrëngoi frenat” presidentit rus Vladimir Putin, i cili donte t’i jepte fund luftës shpejt dhe me lehtësi.

Por në muajt e fundit, Ukraina ka humbur terren në luftën e shkatërrimit për shkak të asaj që kritikët e presidentit amerikan pretendojnë se ishte vonesa gjashtëmujore e Uashingtonit në miratimin e paketës së fundit të ndihmës mbrojtëse.

Për më tepër, lufta e dytë, ajo e Izraelit kundër Hamasit në Gaza , vazhdon, pavarësisht përpjekjeve të Bidet për një armëpushim.

Konfliktet ndërkombëtare do të mbizotërojnë diskutimet në Francë, samitin e G7 në Itali javën e ardhshme, si dhe samitin e NATO-s për të shënuar 75 vjetorin e Aleancës në Uashington në fillim të muajit të ardhshëm.

Lufta e vazhdueshme e Izraelit në Gaza i ka shkaktuar më shumë dëme politike Biden, pasi, ndër të tjera, e ka vënë atë kundër një lëvizjeje që po rritet në kampuset universitare amerikane që përfshin votues tradicionalë ose potencialë.

Në të njëjtën kohë, vazhduan kritikat për ekspozimin, ekonomik dhe politik, të Shteteve të Bashkuara në konflikte që nuk i shqetësojnë ato.

Një sondazh i Neë York Times/Siena College muajin e kaluar zbuloi se gjysma e votuesve të regjistruar në gjashtë shtete thanë se i besojnë Trump më shumë se Biden për të trajtuar konfliktin izraelito-palestinez.

Vetëm 35% thanë se i besojnë më shumë Biden.

Nëse këto zgjedhje vendosen në fushën e politikës së jashtme, Biden është i sigurt se do të humbasë, sipas analistëve politikë.

Kontaktet e ardhshme të Biden me liderët botërorë, vlerësojnë bashkëpunëtorët e tij, ofrojnë një shans të fundit për presidentin amerikan për të nxjerrë në pah avantazhet e qasjes së tij ndaj çështjeve ndërkombëtare: stabilitetin në menaxhimin e krizave dhe marrëdhëniet e forta me aleatët.

Presidenti amerikan pritet të përdorë përvjetorin e zbarkimit të Normandisë për të kujtuar angazhimin e tij për mbrojtjen e demokracisë brenda dhe jashtë vendit.

Në të njëjtën kohë, Biden kërkon, nëpërmjet promovimit të kontakteve të tij diplomatike, të nxjerrë në pah rolin e tij udhëheqës global.

Në një intervistë të gjatë me revistën Time, botuar të martën, ai tha se “ne jemi tani kombi më i fortë ” dhe shtoi: “Ne kemi aleancën më të fortë që Shtetet e Bashkuara kanë pasur ndonjëherë në historinë e tyre”.

Udhëtimet në Francë dhe Itali vijnë disa ditë pasi Biden përshkroi kushtet e një marrëveshjeje të mundshme midis Izraelit dhe Hamasit për një armëpushim pas tetë muajsh lufte, një zhvillim që do të rriste pozitën e tij brenda vendit.

Megjithatë, Netanyahu, i cili është përplasur me presidentin amerikan, tha të hënën se përshkrimi i marrëveshjes ishte “i paplotë”.

Përveç një pauze në luftimet në Gaza që mund të favorizojë presidentin amerikan, një kujtesë se sa kaotik ka qenë ndikimi i rivalit të tij politik Donald Trump në skenën botërore, mund ta ndihmojë atë të fitojë terren.

Çuditërisht, për një “garë” kundër Trump, mund të vlerësohej pozitivisht për Biden se pas luftës në Irak, politika e jashtme nuk luajti më kurrë një rol qendror në formësimin e rezultatit zgjedhor në SHBA.
Ishin çështjet e brendshme ato që përcaktuan votën e shumicës dhe fituesin.