Dërgimi i trupave ushtarakë në Moskë, reagon Koreja e Veriut: Mbështesim Rusinë derisa të arrijë fitoren me Ukrainën

Ministrja e Jashtme e Koresë së Veriut, Choe Son Hui, tha se vendi i saj do të mbështesë Rusinë derisa të arrijë fitoren në Ukrainë gjatë bisedimeve në Moskë të premten me ministrin e jashtëm rus, Sergei Lavrov.

Ajo tha se Pheniani nuk kishte dyshim se nën udhëheqjen e mençur të Putinit, siç e quan ajo, Rusia do të arrijë një fitore të madhe në luftën e tyre të shenjtë për të mbrojtur të drejtat sovrane dhe interesat e sigurisë.
Sergei Lavrov tha se janë vendosur kontakte shumë të ngushta midis ushtrive ruse dhe koreano-veriore dhe ishte thellësisht mirënjohës ndaj “miqve” koreanë për qëndrimin e tyre parimor në lidhje me ngjarjet që kanë ndodhur në Ukrainë.

Mijëra trupa të Koresë së Veriut janë dërguar së fundmi në Rusi, me paralajmërimin e SHBA-së se Moska po përgatitet t’i vendosë ato trupa në luftime në ditët e ardhshme.
Presidenti ukrainas, Volodymyr Zelensky, u bëri thirrje aleatëve të Ukrainës që të ndalojnë shqyrtimin e situatës dhe të ndërmarrin veprime për të trajtuar praninë e trupave të Koresë së Veriut në Rusi përpara se të fillojnë të përballen me vendin e tij në luftime.

Në një video të postuar në Telegram, ai tha se Koreja e Veriut kishte bërë përparim në aftësinë e saj ushtarake, vendosjen e raketave dhe prodhimin e armëve dhe tani pritet të mësojnë luftën moderne.
“Mijëra ushtarët e parë nga Koreja e Veriut janë afër kufirit me Ukrainën. Ukrainasit do të detyrohen të mbrohen kundër tyre”, tha ai.