Kampionët munden nga Gostivari, Shkëndija ndalet me barazim përballë Voska Sporti

Kampionët në fuqi të Superligës së Maqedonisë së Veriut, Struga Trim Lum janë mundur në udhëtim nga Gostivari, përderisa Shkëndija sërish është ndalur me barazim në ndeshjet e luajtura sot në kuadër të xhiros së 12-të të kampionatit.

Skuadra e Shpëtim Duros u mposht nga Gostivari, me këta të fundit që pjesën e parë e mbyllën me avantazh 2:0, ku autor të golave ishin Kehinde dhe Potuk, ndërsa në pjesën e dytë Struga vetëm ngushtoi shifrat në 2:1 me golin e Kompaores.

Shkëndija e Tetovës është ndalur me barazim në shtëpi, duke barazuar 1:1 me Voska Sportin. Mysafirët nga Ohri shënuan të parët në fillim të pjesës së dytë me anë të Medin Bajramit, përderisa kuqezinjtë barazuan përmes supergolit të Adenis Shalës.

Skuadra e Ardian Nuhiut u mundua deri në fund që të gjejë edhe golin e fitores, por nuk arritën që të finalizojnë, duke u ndarë kështu të dyja skuadrat me nga një pikë nga ky takim.

Shkupi ka marrë fitore “komode’, pasi në Çair triumfoi përballë Rabotniçkit me rezultatin 3:0. Golat për triumfin e Shkupit i shënuan Kuka dhe dy herë Queven. Në dy takimet tjera, Vardari mundi Brera Strumicën me rezultat 1:0, përderisa ndeshja ndërmjet Makedonija Gjorçe Petrovit dhe Tikveshit u mbyll me barazim 1:1.

Xhiroja e radhës apo e 13-ta në Superligën e Maqedonisë është në program me 5 nëntor./Telegrafi/