Me armë dhe maska/ Tentuan të vjedhin një banesë, arrestohen tre persona në Lushnjë

Tre persona janë prangosur në Lushnje, pasi tentuan të grabisin një shtëpi në fshatin Bubullimë. Të maskuar dhe me armë zjarri, Gentian Bajrami 22 vjeç dhe 29-vjeçari Ramazan Troka u arrestuan në flagrancë në oborrin e shtëpisë që donin të grabisnin pa arritur ende të hynin.

Në pranga ra edhe një 30-vjeçar, Volter Alushaj, i cili sipas policisë i transportoi dy të rinjtë në vendngjarje dhe po i priste për t’i marrë pas kryerjes së krimit në vendin e quajtur “Rotondoja e Kolonjës”.

Nga operacioni “Momenti” u sekuestrua 1 pistoletë me 1 krehër me fishekë, 2 maska, doreza plastike, 10 lidhëse plastike dhe automjeti i drejtuar nga Alushaj.

Dy të rinjtë që tentuan të grabisnin të maskuar shtëpinë janë nga Radostina e Fierit. Ata do të përballen tashmë me akuzën “Vjedhje me armë, mbetur në tentativë kryer në bashkëpunim”, si dhe “armëmbajtje pa leje e armëve e municioneve luftarake”.