Microsoft kalon edhe pengesën e fundit – merr dritën jeshile në Mbretërinë e Bashkuar për të blerë Activision

Oferta e rishikuar e Microsoft-it për të blerë krijuesin e Call of Duty Activision Blizzard është miratuar nga rregullatorët e Mbretërisë së Bashkuar. Autoriteti i Tregjeve të Konkurrencës (CMA) tha se oferta e përditësuar kishte adresuar shqetësimet, pasi bllokoi marrëveshjen origjinale me vlerë prej 69 miliardë dollarëve në prill.

Microsoft do t’ia dorëzojë Ubisoft-it francez të drejtat për shpërndarjen e lojërave të Activision në konzola dhe PC në cloud. Pavarësisht miratimit të marrëveshjes, megjithatë, CMA kritikoi Microsoft-in. Pasi mbikëqyrësi i konkurrencës bllokoi blerjen në prill, presidenti i Microsoft Brad Smith tha se ishte “keq për Britaninë”.

Paraditen e së premten, drejtoresha ekzekutive e CMA, Sarah Cardell deklaroi: “Bizneset dhe këshilltarët e tyre nuk duhet të kenë asnjë dyshim se taktikat e përdorura nga Microsoft nuk janë mënyra për t’u angazhuar me CMA, raporton BBC, transmeton Telegrafi.

“Microsoft pati mundësinë të ristrukturohej gjatë hetimit tonë fillestar, por në vend të kësaj vazhdoi të insistonte në një paketë masash që ne u thamë atyre se thjesht nuk do të funksiononin. Zvarritja e procedurave në këtë mënyrë vetëm humbet kohë dhe para”, shtoi tutje ajo. CMA bëri të ditur se oferta e rishikuar do të “ruajë çmimet konkurruese” në industrinë e lojërave dhe do të sigurojë më shumë zgjedhje dhe shërbime më të mira.

“Me shitjen e të drejtave të transmetimit në cloud të Activision për Ubisoft, ne jemi siguruar që Microsoft nuk mund të ketë një pengesë mbi këtë treg të rëndësishëm dhe me zhvillim të shpejtë”, vazhdoi ndër të tjera Cardell.

Smith tha se Microsoft ishte “mirënjohës për shqyrtimin dhe vendimin e plotë të CMA”. Ai shtoi se “pengesa përfundimtare rregullatore” ishte kapërcyer për gjigantin e teknologjisë për të përfunduar marrëveshjen e blerjes, ndërsa një zëdhënës i Activision Blizzard bëri të ditur se marrëveshja e miratuar ishte “lajm i madh”.

Marrëveshja shënon një ndryshim të madh për industrinë e lojërave. Ai e forcon më tej Microsoft-in si një gjigant video-lojërash, për të habitur shumë rivalin e tij kryesor Sony, pronar i konsolës së PlayStation. /Telegrafi/