Përdorimi i armëve kundër objektivave ruse, Moska paralajmëron Perëndimin për ‘pasoja fatale’

Zëvendësministri i Jashtëm rus Sergei Ryabkov tha sot se Shtetet e Bashkuara mund të përballen me “pasoja fatale” nëse nuk marrin parasysh paralajmërimet e Moskës për të mos lejuar Ukrainën të përdorë armët e ofruara nga Uashingtoni për të goditur objektivat brenda Rusisë. Ryabkov po komentonte vendimin e Presidentit Joe Biden javën e kaluar për të autorizuar përdorimin e armëve që Ukraina mori nga SHBA për të goditur objektivat brenda Rusisë të përfshirë në sulmet në Kharkiv.

“Dëshiroj të paralajmëroj liderët amerikanë që të mos bëjnë llogaritje të gabuara që mund të kenë pasoja fatale. Për arsye të panjohura, ata nënvlerësojnë seriozitetin e përgjigjes që mund të marrin”, tha Ryabkov. Ai iu referua komenteve të bëra javën e kaluar nga Presidenti Vladimir Putin, i cili tha se vendet e NATO-s po luanin me zjarrin dhe rrezikonin të ndeznin një konflikt më të thellë global, një seri paralajmërimesh nga Moska për rrezikun e përshkallëzimit serioz.

Sekretari i Përgjithshëm i NATO-s, Jens Stoltenberg tha javën e kaluar se NATO ka të drejtë të ndihmojë Ukrainën për të mbrojtur veten dhe se kjo nuk e bën NATO-n palë në konflikt. Një burim në shërbimet e inteligjencës së Kievit tha javën e kaluar se një dron ukrainas shënjestroi një radar me rreze të gjatë thellë brenda territorit rus që është pjesë e sistemit të paralajmërimit të hershëm bërthamor të Rusisë.
Për më tepër, Ministria e Jashtme ruse tha se diskutimet nëse do t’i lejohet Ukrainës të përdorë sistemet e mbrojtjes ajrore Patriot mbi territorin rus tregojnë se Perëndimi është në një rrugë të përshkallëzimit, sipas agjencisë së lajmeve TASS. Rusia do të marrë të gjitha masat për të parandaluar kërcënime të tilla, tha Ministria e Jashtme ruse.