Profesori: Ky është shqetësimi në komunën e Bujanocit

Profesori nga Presheva, Refik Hasani, në një prononcim për “Bora sot”, ka ngritur një shqetësim sa i përket zgjedhjeve lokale në Bujanoc.

Ai ka thënë se zgjedhjet atje u mbajtën, por komuna nuk udhëhiqet nga shqiptarët, e që sipas tij përbënë problem serioz.

“Zgjedhjet lokale në Bujanoc, u mbajtën më datën 2 qershor të muajit të kaluar, ku pati rivotim, por me gjithë atë rezultatet e këtyre zgjedhjeve u çertifikuan. Që nga koha e çertifikimit, nuk u arrit asnjë kompromis shumë i domosdoshëm nga shumica shqiptare. Periudha e konstituimit të Kuvendit Komunal të Bujanocit, sipas ligjeve në fuqi, duhet brenda afatit të bëhet themelimi i funksionimit të kësaj legjislature. Sot, në Bujanoc është lidhur një koalicion në mes një subjekti politik shqiptar, që numrëon vetëm 8 këshilltarë komunal të Bujanocit, kurse mbesin jashtë këtij koalicioni shumica shqiptare prej 18 këshilltarëve komunal shqiptar.

Të mbetët shumica shqiptare, jashtë këtij koalicion, dhe të jenë pjesë e këtij koalicion gjithë subjektet politike serbe, dhe ata të komunitetit rom, është veprim jo i matur dhe i dëmshëm për shumicën e votuesve shqiptarë të Komunës së Bujanocit. Ky koalicion i arritur është vështirë të funksionoj, pasi nuk përfaqëson shumicën shqiptare. Kurse Bujanoci, nuk ka lluks të shkoj në zgjedhje çdo vit. Nëse shkohet me veprime të tilla, që  vota e shumicës Shqiptare të shpërfillet,  kështu Bujanoci do të pëson sikur Medvegja”, shpjegon profesori.

Më tej, ai thotë se Bujanocin duhet ta udhëheqin shqiptarët dhe dhe koalicioni i ndërtuar aktualisht të mos e fillojë punën dhe te prishet.

“Presheva, Medvegja dhe Bujanoci kanë sakrifikuar shumë se këto tri komuna, kanë mbajtur dhe organizuar edhe Referendumin e datës 1 dhe 2 marsit 1992, po ashtu Ushtria Çlirimitare për Preshevë, Medvegjë e Bujanoc, ka mbrojtur pragun, nderin dhe dinjitetin e shqiptarëve të këtij Rajoni, prandaj legjislatura e re nuk është dashur të udhëhiqet nga pakica shqiptare, e shumica të mbetet jashtë këtij koalicioni.

Apeloj publikisht që ky koalicion, nga subjekti politik shqiptar, që numëron vetëm 8 këshilltarë, më mirë të prishet pa filluar, që në fillim, se sa të mos funksionoj Kuvendi i Bujanocit, e aq më larg qoftë të shkohet në zgjedhje të parakohshme.

Në vend të unfikohen, të koordinohen duke u harmonizuar qëndrimet mbi artikulimin e çështjeve, që do të duhej të adresohen, shumica e këshilltarëve Komunal të Bujanocit, nuk e udhëheqin Komunën e Bujanocit.

Bujanoci, do të duhej të udhëhiqej nga shumica shqiptare, e jo nga një subjekti politik shqiptar, që numëron vetëm 8 këshilltarë komunal të Bujanocit”, përfundon ai për “Bota sot”.