7 months ago
14
Kuzhina gjirokastrite spikat në kulinarinë shqiptare me larmishmërinë dalluese të saj në gatimet tipike tradicionale, shijeplota dhe me famë kudo në botë.
Gatimet gjirokastrite janë ndër më të vjetrat e traditës shqiptare. Recetat dhe shija e tyre fantastike dhe mjeshtëria e gatimeve të amvisave gjirokastrite është padyshim një ndër thesaret e çmuara të kuzhinës sonë.
Duke nisur nga pashaqoftetë, qifqitë (qoftet me oriz), byrekët e ndryshëm, gjellët tipike, ëmbëlsirat e ndryshme, bakllavaja etj.
Gratë nikoqire gjirokastrite shquhen për gatimet e tyre speciale e prej shekujsh kanë mahnitur këdo vizitor të huaj e vendas, miq e mysafirë kur shtronin sofrën plot gatime tradicionale.
Të përgatitura në mënyrë perfekte, me masat e sasitë e duhura, me produktet më të freskëta e më të shijshme, çdo pjatë e gatuar nga amvisat gjirokastrite të mahnit me shijen dhe aromën e saj, duke ndjellur oreksin dhe nepsin për t’i shijuar menjëherë.
AgroWeb.org u sugjeron më poshtë një nga gatimet më tipike e më të shijshme të kuzhinës gjirokastrite, qifqitë, një gatim fantastik për t’u shijuar bashkë me familjen.
Një gatim i thjeshtë por shumë i shijshëm e mbi të gjitha fantastik për t’u shërbyer në tryezë si meze në shoqërimin e gatimeve të tjera tradicionale.
Përgatitja e Qifqive Gjirokastrite në Shtëpi
Përbërësit
(Përbërësit përzgjidhen në bazë të numrit të personave në familje)
- Për një gotë oriz duhen:
- 3-4 kokrra vezë
- 5 lugë vaj ulliri për skuqje
- Kripë
- Piper
- Nenexhik
Përgatitja
Orizi pastrohet, lahet dhe vendoset të zjejë në ujë të valuar me kripë derisa të përgatitet si pilaf i thatë.
Hiqet nga zjarri. Lihet të ftohet pak dhe duke e përzjerë me lugë druri, hidhen vezët një e nga një.
Shtohet nenexhik, kripë dhe piper.
Në një tigan të posaçëm me gropa hidhet vaji ulliri, në secilën prej gropave hidhet nga një lugë nga masa e brumit të qofteve me oriz e vezë.
Skuqen nga të dyja anët./AgroWeb.org
English (US) ·