Serbia e Kosova, hetime ndaj Radoiçiçit: Ende, asnjë kërkesë për ekstradim

Prokuroria Speciale e Republikës së Kosovës është aktualisht në procesin e mbledhjes së informatave dhe dëshmive në lidhje me këtë rast. Në të njëjtën kohë, hetime për ish-nënkryetarin e Listës Serbe dhe ngjarjen në veri ka nisur edhe Prokuroria e Serbisë, por nuk është e qartë nëse dy institucionet do të bashkëpunojnë me njëra-tjetrën.

Zëdhënësi i BE-së, Petër Stano deklaroi një ditë më parë se Kosova ka mandatin të hetojë sulmin e 24 shtatorit dhe se Serbia ka detyrimin të bashkëpunojë me të, pa kushte. Edhe pse Radoiçiçi mori përsipër përgjegjësinë e sulmit të armatosur, autoritetet kosovare vazhdojnë të këmbëngulin se pas Radoiçiçit qëndron lidershipi serb, ndërsa Beogradi mohon të ketë gisht.

Madje si për ta vulosur këtë në sytë e opinionit publik dhe ndërkombëtareve, presidenti serb Aleksandër Vuçiç deklaroi në një intervistë për CNN se të gjithë ata që morën pjesë në sulmin ndaj policisë së Kosovës në Banjskë “do të japin llogari para institucioneve të Serbisë”.

Radoiçiç është në territorin e Serbisë, u shpreh ai, dhe prokuroria do të bëjë punën e saj”. Ministrja e Drejtësisë e Kosovës, Albulena Haxhiu, tha se, deri më tani prokuroria që merret me rastin e sulmit në Banjksë, nuk ka bërë ndonjë kërkesë për ekstradimin e Radoiçiçit dhe të tjerëve nga Serbia në Kosovë.

Në momentin që do të kemi kërkesa për çështje ndërkombëtare apo për çfarëdo bashkëpunimi tjetër, sigurisht që do t’i paraqesim tek institucionet përgjegjëse, në këtë rast te Serbia, pa vonesa, u shpreh ajo, duke shtuar megjithatë se vendi fqinj ka refuzuar deri më tani çdo lloj bashkëpunimi me Kosovën ndaj konsideron se ndërhyrja ndërkombëtare, do të jetë e domosdoshme.

Top Channel