Solidarizohet Prishtina! Ndërtesa e Qeverisë ndriçohet me lulen simbolike të masakrës së Srebrenicës

Sot përkujtohet 28 vjetori i ngjarjes së cilësuar si më e renda pas Luftës së Dytë Botërore.

Lulja simbolike e Srebrenicës përcjell një mesazh të fortë, ku e bardha nënkupton pafajësinë, e gjelbra nënkupton shpresën dhe 11 petalet janë për datën 11 korrik të viti 1995, ditën kur ndodhi masakra.

Më shumë se 8,000 burra dhe djem myslimanë boshnjakë u vranë kur forcat serbe sulmuan qytetin lindor të Srebrenicës në korrik të vitit 1995, pavarësisht pranisë së trupave paqeruajtëse holandeze.

Edhe pse Këshilli i Sigurimit i OKB-së e kishte shpallur Srebrenicën një “zonë të sigurt” në pranverën e vitit 1993, trupat e udhëhequr nga gjenerali Ratko Mlladiç, i cili më vonë u shpall fajtor për krime lufte, krime kundër njerëzimit dhe gjenocid, pushtuan zonën.

Trupat holandeze nuk arritën të vepronin ndërsa forcat serbe pushtuan zonën, duke vrarë rreth 2,000 burra dhe djem vetëm më 11 korrik. Rreth 15,000 banorë të Srebrenicës u larguan në malet përreth, por trupat serbe gjuajtën dhe vranë 6,000 njerëz të tjerë. Trupat e viktimave janë gjetur në 570 vende në të gjithë vendin.

Në vitin 2007, Gjykata Ndërkombëtare e Drejtësisë në Hagë vendosi se në Srebrenicë ishte kryer gjenocid.

Top Channel