Të paktën 100 të vdekur nga një zjarr në një dasmë në Irak! Dyshohet se u shkaktua nga fishekzjarret

Të paktën 100 persona kanë vdekur dhe 150 të tjerë raportohet se janë plagosur pas një zjarri që shpërtheu në një dasmë në Irakun verior.

Qindra njerëz po festonin në Al-Hamdaniya në provincën veriore Nineveh të Irakut, ne momentin që zjarri shpërtheu në vendin e ngjarjes në orët e vona të së martës, shkruan BBC.

Nuk dihet ende se çfarë e shkaktoi zjarrin, por sipas raportimeve të para thuhet se ai shpërtheu pasi u ndezën fishekzjarrë.

“Zjarri çoi në shembjen e pjesëve të sallës si rezultat i përdorimit të materialeve ndërtimi shumë të ndezshme dhe me kosto të ulët që shemben brenda pak minutash kur shpërthen zjarri”, tha drejtoria e mbrojtjes civile të Irakut, cituar nga agjencia shtetërore e lajmeve INA.

Nuk ishte e qartë nëse nusja dhe dhëndri ishin mes viktimave. Raportet fillestare në mediat irakiane thanë se ata kishin vdekur nga flakët, ndërsa agjencia e lajmeve Nina më vonë raportoi se ata ishin gjallë, por po trajtoheshin për djegie. Një foto e postuar nga Nina tregonte dhjetëra zjarrfikës që po luftonin me zjarrin, dhe fotot nga gazetarët lokalë në mediat sociale tregojnë mbetjet e djegura brenda sallës së dasmave.

Dëshmitarët okularë thanë se qindra njerëz ishin atje duke festuar kur ndërtesa mori flakë rreth orës 10:45 me orën lokale.