Deputeti gjerman tregon se kush po ndikon në dështimin e dialogut: Është e kot të mendohet se Serbia do ta njoh Kosovën

Ambasadori amerikan në Kosovë, Jeff Hovenier në një deklarim të fundit ka thënë se SHBA pret nga Kosova dhe Serbia të zbatojnë me urgjencë dhe pa parakushte të gjitha detyrimet e pranuara në dialogun e ndërmjetësuar nga Bashkimi Evropian, duke theksuar se Marrëveshja është ligjërisht e detyrueshme për të dyja palët dhe se njohja e ndërsjellë duhet të jetë rezultati përfundimtar i dialogut.

Ndërkaq, Ambasadori i Gjermanisë në Kosovë, Jorn Rohde, ka thënë se e mbështetë deklaratë e homologut amerikan Jeffrey Hovenier, se Gjykata Kushtetuese është i vetmi institucion që mund ta vlerësojë draft-statutin e Asociacionit.

Lidhur me këto deklarime, për ‘Bota sot’ ka folur deputeti i Bundestagut gjerman, Knut Abraham. Ai i pyetur nëse Serbia do të pranojë njohjen e shtetit të Kosovës dhe të jetë pjesë e Bashkimit Evropian, shprehet skeptik për vendimet serbe.

Ai thotë se është e kot të besohet se Serbia do ta njoh Kosovën.

“Kjo qeveri serbe ka deklaruar hapur se nuk do ta njohë Kosovën. Në këtë moment, duke pasur parasysh deklaratat dhe veprimet e përsëritura të liderëve serbë kundër njohjes apo normalizimit, de jure por edhe de fakto, është e kotë të besohet se Serbia po lëviz në këtë drejtim”, vlerëson ai.

Tutje, deputeti thotë se mungesa e një politike të besueshme të BE-së, reflekohet tek dështimi i dialogut.

“Mungesa e një politike të besueshme të BE-së ndaj rajonit, e cila vazhdon, çon në humbjen e levave, e cila reflektohet në dështimin e dialogut”, vlerëson ai.