Hiqshin si zyrtarë të lartë, çifti i bashkëshortëve kërkoi t’i zhvaste përmes mashtrimit 8 mijë euro operatorit ekonomik, pranga edhe mikes së tyre

Një rast mashtrimi dhe zhvatjeje në grup teksa hiqeshin si zyrtarë të lartë shtetërorë nëpërmjet platformës Signal, është goditur nga organet ligjzbatuese.

Policia e Vlorës njoftoi se finalizoi operacionin e koduar “Notification”, për goditjen e një rasti të mashtrimit të operatorëve ekonomikë, duke tentuar të merrnin 8 mijë euro nga një biznesmen vendor që i denoncoi.

Tre persona ranë në pranga, mes të cilëve një çift bashkëshortësh dhe bashkëpunëtorja e tyre.

I dëmtuari njihet si një operator ekonomik në zonën e Himarës.

“Ndërhyrja u bë pas denoncimit nga administratori i një subjekti tregtar në Himarë, se i kishin kërkuar një shumë parash, gjatë komunikimeve në aplikacionin “Signal”. Si rezultat i veprimeve hetimore të kryera në kuadër të këtij operacioni, u identifikuan dhe u arrestuan shtetasit: S. D., 30 vjeçe dhe K. D.(K.), 32 vjeç (bashkëshortë), dhe D. V., 27 vjeçe, të tre banues në Vlorë”, tha policia vendore.

Nga hetimet e deritanishme rezulton se pasi kanë kontaktuar biznesmenin nëpërmjet një numri telefoni, “të regjistruar si numër kontakti i një zyrtari, në aplikacionin “Signal”, kanë rritur edhe besueshmërinë e kërkesave të tyre, për të përfituar shumën prej 8 000 euro.

Në cilësinë e provës materiale u sekuestruan 1 automjet dhe 4 celularë, teksa vijon hetimi aktiv për identifikimin e shtetasve të tjerë të përfshirë në këtë veprimtari kriminale.    

Gjithashtu Drejtoria Vendore e Policisë Vlorë apeloi për qytetarët, që “të raportojnë menjëherë për çdo rast të mashtrimit apo të përpjekjes për mashtrim, për t’i parandaluar raste të tilla”, njofton policia./vizionplus.tv