“Kurti e kapi mat edhe Vuçiqin”/ Vetëm kështu Serbia mund ta dorëzojë Radoiçiqin

Ndër tri kushtet që kryeministri Kurti vendosi për tu takuar me presidentin serb, Aleksandër Vuçiq, ishte edhe ai që Serbia ta dorëzojë në Kosovë terroristin Milan Radoiçiq dhe grupin e tij të cilët kryen sulëm terrorist në Kosovë në shtatorin e vitit të kaluar.

E pikërisht kjo pikë, si duket është bërë problematike për Serbinë, gjë e cila qoi edhe në dështimin e takimit trepalësh në Bruksel.

Por kjo lëvizje e Kurtit po vlerësohet si shumë e qëlluar edhe e mirë menduar.

“Unë e shoh kushtin e Kurtit, për dorëzimin e Radoiçiqit organeve të drejtësisë si kusht për takimin me Vuqiçin si një lëvizje shumë të mençur dhe gjithashtu shumë të arsyeshme! Sidomos ky kusht ja ka bërë te qartë BE-së, se heshtja dhe injorimi i faktit se Radoiçiqi ka kryer akt terrorist nuk do tolerohet më nga shteti i Kosovës!”, shprehet Luan Gacaferi, anëtar i kryesisë së partisë Guxo.

Sipas tij, më këtë kusht, Kurti e kapi “mat” Vuçiqin.

“Ky kusht për dorëzimin e Radojqiçit te organet e drejtësisë në Kosovë e ka kapur "mat" edhe Vuqiçin i cili s'ka më si ta arsyetoj mos dorëzimin e Radojqiçit në Kosovë ku edhe e ka kryer aktin terrorist! Kushti i Zt. Kurti, qe të dorëzohet Radoiçiq ishte një grusht i rëndë dhe i pa pritur për Vuqiçin si në arenën ndërkombëtare ashtu edhe atë brenda Serbisë!”, shton Gacaferi.

Por a do ta dorëzojë Serbia terroristin serb tek shteti i Kosovës?

“Unë nuk besojë qe Vuqiq do e dorëzojë Radoiçiqin të organet e drejtësisë në Kosovë! Por nëse shtohet presioni ndërkombëtar për ta dorëzuar Radoiçiqin, jam shumë i sigurt se Vuqiq do ta dorëzojë tek organet e drejtësisë në Kosovë, për të shpëtuar lëkurën e tij! Pra gjithçka varet nga presioni ndërkombëtar!”, thekson Gacaferi.

“Dhe për fund, unë jam i bindur se zt. Kurti, ka vepruar në mënyrë gjeniale duke ja lënë Vuqiçit, "ngile" taktikisht dhe tani topi është në fushën e Serbisë!”, përfundon për “Bota sot” anëtari i kryesisë së partisë Guxo, Luan Gacaferi.