Kuvendi i heq imunitetin Berishës, ish-kryeministri: Veprim antikushtetues

Parlamenti votoi vetëm me votat e shumicës pro dy raporteve të Këshillit të Mandateve dhe Imunitetit, një i relatores socialiste Klotilda Bushka dhe i demokratit Enkeled Alibeaj, për të autorizuar SPAK-un të procedojë me arrestimin e Sali Berishës.

Edhe pse e kishte të drejtën të fliste përpara parlamentit për të vërtetën e tij, Berisha e refuzoi këtë të drejtë. Por një qëndrim të shkurtër e mbajti në përfundimin e seancën, e cila zgjati sërish vetëm 8 minuta.

“Parlamenti sot vazhdoi veprën që dështoi me datën 9 shtator, dy vite më parë. Ju garantoj se sot do jetë më i dështuar se kurrë, se ky vendim jo që nuk mund të realizojë qëllimet, shkatërrimin e opozitës”.

Kjo seancë prodhoi të njëjtat pamje dhe situatë kaotike si ato të 2 muajve të fundit. Përplasje mes deputeteve dhe Gardës në hyrje në parlamentit, përpara nisjes së seancës… Por dhe gjatë seancës ku u ndezën sërish flakadanët shumëngjyrësh.

E ndërsa seanca kishte të parën në rendin e ditës kërkesën për autorizim nga SPAK-u, ajo që mbyllte axhendën e kësaj seance ishin ndryshimet në ligjin për komisionet hetimore, çështja që ka futur parlamentin në këtë situatë.

Demokratët i kanë kundërshtuar që në fillim këto amendime pasi sipas tyre ato pengojnë opozitën në ngritjen e komisioneve hetimore.

Kjo ishte seanca e fundit për këtë vit. Sesioni i ardhshëm duhet të nisë të hënën e parë të javës së tretë të janarit. Nuk dihet nëse kjo kohe do t’ju shërbejë palëve për të negociuar dhe për të rikthyer jetën normale parlamentare.

Tv Klan

Të ngjashme