Një poster me Donald Trumpin shfaqet në Beograd, ftesa: Bëjini “tag” Albin Kurtit!

Fitorja e Donald Trump në zgjedhjet amerikane përballë Kamala Harris, ka nxitur reagime të ndryshme në rajonin e Ballkanit Perëndimor. Ndryshe nga të gjitha vendet e tjera të rajonit, në Beograd duket se fitorja e republikanit ka shkaktuar gëzim të madh. Aq sa të ironizojnë edhe kryeministrin Albin Kurtin.

Kafeneja “Pavle Korcagin” ka vendosur një poster të Donald Trumpit në madhësi reale përpara hyrjes së lokalit. Aty pronarët kanë një ftesë për të gjithë klientët e tyre. Të bëjnë një foto dhe t’i bëjnë “tag”, kryeministrit të Kosovës, Albin Kurtit.

Trump pritet që të betohet si president pas datës 20 janar dhe Joe Biden do të qëndrojë në pushtet deri atëherë – megjithëse ai do të jetë shumë i kufizuar politikisht.

Në këto zgjedhje Trump ka marrë gjithsej më shumë vota se Kamala në nivel të gjithë Amerikës dhe e ka kaluar atë edhe për nga numri i votave kyçe elektorale, që ka mbledhur deri më tani, 295 kundrejt 226 të saj. Ai fitoi pesë nga shtatë shtetet që ishin vendimtare në këto zgjedhje dhe kryeson në Nevada dhe Arizona, dy shtetet e vetme që nuk kanë shpallur ende fitues. Përveç fitores së Trump, republikanët rifituan edhe kontrollin e Senatit, dhe po kryesojnë në garën për Dhomën e Përfaqësuesve.