“Puskas”, çmimi i pafituar nga Messi

Lionel Messi është ndër lojtarët më të kurorëzuar me çmime individuale në botë. ‘Pleshti’ argjentinas ka fituar pothuajse gjithçka në karrierë deri më tani, kulmuar me ‘Topin e Artë’ që i akordohet futbollistit më të mirë në botë.

Por pavarësisht kësaj, lojtari aktual i Inter Miami nuk ka fituar vetëm një çmim ku është nominuar. Bëhet fjalë për çmimin ‘Pushkash’ që akordohet për golin më të mirë të vitit në botën e futbollit.

Në total, Messi ka qenë i nominuar për çmimin ‘Pushkash’ shtatë herë dhe tashmë janë bërë pesë vite që prej nominimit të tij të fundit. 36-vjeçari ka qenë në garë kryesisht me fanellën e Barcelonës, por edhe me kombëtaren e Argjentinës.

Ish-lojtari i PSG realizoi në mënyrë spektakolare në portën e Atletikos së Bilbaos, por edhe ndaj Nigerisë në Kupën e Botës të Rusisë 2018, gjithsesi pa arritur të fitojë pikët e duhura për të rrëmbyer këtë çmim. Realizimi ndaj baskëve ishte më pranë fitores së këtij trofeu individual, por në fund zuri vendin e dytë.