Putin shtang botën: Shenja granatash janë gjetur në trupin e vdekur të Prigozhin

Presidenti rus, Vladimir Putin, tha të enjten se gjurmë eksplozivi u zbuluan në eshtrat e shefit mercenar të Wagner, Yevgeny Prigozhin dhe ekuipazhit të tij, pasi avioni i tyre u rrëzua mbi Rusi në gusht, duke i lënë të dhjetë personat në bord të vdekur.

Avioni i Prigozhin u rrëzua midis Moskës dhe Shën Peterburgut në gusht, dy muaj pasi ai drejtoi një rebelim të shkurtër kundër ushtrisë më të lartë të Rusisë.

Kritikët e Kremlinit dhe vendet perëndimore kanë komentuar se kjo mund të jetë një “lojë e pisët” që Putin vetë po e luan.

Komentet e presidentit rus ishin përditësimi i parë i rëndësishëm mbi hetimin e Rusisë për rrëzimin.

“Kreu i Komitetit Hetues më raportoi disa ditë më parë”, parashtroi Putin në një takim të klubit të diskutimit Valdai. “Në trupat e viktimave të fatkeqësisë ajrore u gjetën fragmente të granatave të dorës. Nuk kishte asnjë ndikim të jashtëm në aeroplan”.

Hetuesit rusë kanë thënë se po hetojnë të gjithë skenarët e mundshëm rreth përplasjes, përfshirë vrasjen e paramenduar.

Putin kritikoi të enjten hetuesit për mos kryerjen e testeve të alkoolit dhe drogës te Prigozhin dhe nëntë viktimat e tjera të përplasjes.

Ai gjithashtu pretendoi se pesë kilogramë kokainë u gjetën në zyrat e Wagner pas rebelimit jetëshkurtër të grupit mercenar.

“Nuk është bërë test gjaku për alkoolin”, tha Putin.

“Edhe pse ne e dimë se pas ngjarjeve të famshme në kompaninë (Wagner) në Shën Peterburg, FSB (shërbimi i sigurisë) gjeti jo vetëm 10 miliardë para në dorë, por edhe pesë kilogramë kokainë”, vijoi ai.

Prigozhin udhëhoqi një rebelim të armatosur kundër udhëheqjes ushtarake të Moskës në qershor, në kërcënimin më të madh për sundimin dy-dekadent të Putinit.

Pas rrëzimit, Putin e përshkroi atë si një njeri që kishte bërë “gabime serioze në jetën e tij, por ai arriti rezultatet e duhura”.