Ronaldo nuk ndalet së vendosuri rekorde

Cristiano Ronaldo vijon të thellojë rekordet me kombëtaren portugeze. Ronaldo shënoi golin numër 128 me kombëtaren, duke mbajtur ritëm të lartë kundrejt rivalëve më të afërt. Sulmuesi i Al Nassr shënoi golin e 10-të në këto kualifikuese, për tu ngjitur në kuotën e 27 golave në po kaq ndeshje gjatë këtij viti kalendarik. Ritëm i kënaqshëm, pasi Ronaldo shënon mesatarisht një gol çdo ndeshje. Duartrokitjet nuk munguan në momentin e zëvendësimit.

Tashmë në moshën 38-vjeçare, sulmuesi mbetet lideri i Luzitanëve, që po kalojnë një formë fantastike nën drejtimin e trajnerit Roberto Martinez. Nën drejtimin e tij, Portugalia ka shënuar 34 gola në 9 ndeshje, të gjitha të fituara dhe pësuar vetëm 2 gola.

Portugalia ka zhvilluar edhe eliminatoret më perfekte, pasi ka fituar të 9 takimet, e distancuar ndjeshëm me rivalët. Në rast triumfi në duelin e fundit me Islandën, do të bëhej kombëtarja që ka fituar të gjithë sfidat eliminatore, ndërsa Ronaldo do thellonte fitoret në këto kualifikuese. Momentalisht, portugezi numëron 31 fitore, kundrejt 30 të Sergio Ramos dhe 28-të të Luka Modric e Gianluigi Buffon.