Rusia godet Ukrainën me raketa/ Polonia aktivizon avionët luftarakë për të mbrojtur hapësirën ajrore

Javën e kaluar një raketë ruse kaloi në territorin polak , sipas ushtrisë polake.

Polonia, një anëtare e NATO-s që ndan një kufi me Ukrainën, tha se aktivizoi avionë luftarakë F-16, pasi Rusia nisi sulmin e saj të fundit me raketa vdekjeprurëse në Ukrainë, duke synuar kryeqytetin Kiev dhe Kharkivin lindor.

“Dëshirojmë t’ju informojmë se po vëzhgohet një aktivitet intensiv i aviacionit me rreze të gjatë të Federatës Ruse, i cili lidhet me kryerjen e sulmeve në territorin e Ukrainës”, shkroi Komanda Operative e Polonisë në X.

Ajo tha se aktivizoi një palë avionë luftarakë të vendosur në një bazë në Łask dhe në Krzesiny “për të garantuar sigurinë e hapësirës ajrore polake”.

Rusia ka rritur sulmet e saj në Ukrainë gjatë periudhës së Vitit të Ri dhe të premten kreu sulmin më të madh raketor që nga fillimi i pushtimit të saj në shkallë të plotë gati dy vite më parë.

Zëvendësministri i Jashtëm polak Wladysław Teofil Bartoszewski thirri të ngarkuarin me punë të Rusisë Andrei Ordash dhe i kërkoi shpjegim. Por Rusia tha se “nuk do të japë shpjegime” derisa të paraqiten prova konkrete, raportoi media shtetërore ruse RIA Novosti.

Ordash tha për RIA Novosti se shënimi “përmbante vetëm akuza të pabaza”, duke shtuar se Polonia “kishte refuzuar të jepte prova se raketa ishte me origjinë ruse”.

Top Channel