Liderët e rajonit janë mbledhur këtë të hënë në Shkup për samitin e radhës të procesit të Brdo Brijunit.
Në takim marrin pjesë presidenti Bajram Begaj, presidentja e Kosovës Vjosa Osmani, Jakov Milatoviç nga Mali i Zi, presidenti serb Aleksandar Vuçiç dhe anëtarët e presidencës së Bosnjës dhe Hercegovinës.
Shtetet pjesëmarrëse pritet të riafirmojnë përmes një deklaratë të përbashkët angazhimin për forcimin e bashkëpunimit rajonal, zgjidhjen e çështjeve të hapura dhe përparimin drejt integrimit në Bashkimin Evropian.
Siç ka bërë me dije presidenca e Maqedonisë së Veriut, e cila është edhe pritëse e takimit në fokus të diskutimeve të liderëve të vendeve pjesëmarrëse në procesin Bërdo-Brijuni janë integrimi evropian, ndryshimet klimatike dhe emigracioni i të rinjve.
Presidenti Begaj gjatë vizitës në Shkup do të zhvillojë gjithashtu takime dypalëshe, si edhe do të takohet me liderët e partive politike shqiptare në Maqedoni të Veriut.
Procesi i Brdo Brijunit është një nismë slloveno-kroate, e ndërmarrë për herë të parë në vitin 2010 nga kryeministri i Sllovenisë.
Qëllimi i saj është forcimi i besimit të ndërsjellë në Ballkanin Perëndimor, bashkëpunimi rajonal dhe integrimi më i shpejtë i këtij rajoni në BE.