Shumë civilë po vdesin në Gaza, Blinken do të diskutojë rreth kësaj me Netanyahun në Izrael

Sekretari amerikan i Shtetit, Antony Blinken do të diskutojë me Izraelin rreth hapave që duhet të merren për të minimizuar viktimat civile.

“[Ne] do të flasim për hapa konkretë që mund dhe duhet të ndërmerren për të minimizuar dëmin ndaj burrave, grave dhe fëmijëve në Gaza, dhe kjo është diçka për të cilën Shtetet e Bashkuara janë të përkushtuara”, tha Blinken para një vizite në Izrael.

Ndërsa sekretari nuk dha detaje të tjera, ai përsëriti se kjo temë është në agjendën e vizitës e zyrtarit amerikan. Blinken pritet të takohet me kryeministrin izraelit, Benjamin Netanyahu dhe udhëheqës të tjerë të qeverisë izraelite, sipas Departamentit të Shtetit, raporton cnn.

“Kur shoh një fëmijë palestinez, një djalë apo një vajzë të nxjerrë nga rrënojat e një ndërtese të shembur, kjo më godet po aq sa kur shoh një fëmijë në Izrael apo kudo tjetër. Pra, kjo është diçka që ne kemi detyrim t’i përgjigjemi dhe do ta bëjmë”, tha ai.

I pyetur nëse Izraeli kishte treguar vetëpërmbajtje në ofensivën në Gaza, Blinken nuk dha një përgjigje po ose jo, dhe në vend të kësaj përsëriti se Izraeli ka të drejtë të mbrohet dhe ka “përgjegjësi për të bërë gjithçka që është e mundur për të mbrojtur civilët”.

Blinken pritet të vizitojë Izraelin, Jordaninë, Japoninë, Korenë e Jugut dhe Indinë. /Telegrafi/