Tajvani prezanton nëndetësen e parë teksa rrit mbrojtjen kundër Kinës

Presidentja tajvaneze Tsai Ing-wen ka qenë pjesë e ceremonisë së lansimit në qytetin Kaohsiung. Zyrtarët amerikanë kanë paralajmëruar se Kina mund të jetë ushtarakisht e gatshme për të nisur një pushtim në vitet në vijim. Tajvani është ishull që vetëqeveriset, mirëpo Kina e konsideron të sajin dhe zotohet se një ditë do ta rikthejë kontrollin mbi të, qoftë edhe me forcë.

Ka vëzhgues që besojnë se Kina nuk do ta sulmojë këtë ishull shpejt, dhe Pekini ka thënë se synon të arrijë “ribashkim” paqësor me Tajvanin. Mirëpo, në të njëjtën kohë, e ka paralajmëruar Tajvanin që të mos e shpallë pavarësinë, pavarësisht ndihmës prej jashtë. Kina e ka rritur së fundmi presionin mbi ishull, pasi kryen vazhdimisht stërvitje ushtarake afër Ngushticës së Tajvanit.

“Kjo ditë do të mbetet përgjithmonë në histori”, ka thënë Tsai, teksa ka qëndruar para nëndetëses së gravuar me flamurin e Tajvanit. Ajo ka thënë se ideja e prodhimit të një nëndetëseje më parë, është vlerësuar si diçka e pamundshme “mirëpo ne ia dolëm”. Nëndetësja në vlerë të 1.5 miliard dollarëve, e cila funksion me naftë dhe rrymë, do të duhet t’iu nënshtrohet një morie testimesh nga marina deri në fund të vitit 2024.

Është emërtuar Haikun, sipas një peshku masiv mistik, që sipas literaturës klasike kineze ka aftësi edhe të fluturojë. Një nëndetëse e dytë e tillë është në prodhim e sipër. Tajvani synon që ta ketë një flotë me 10 nëndetëse, duke përfshirë dy anije të prodhuara nga Holanda, dhe ato më pas t’i pajisë me raketa.

Raportet mes Kinës dhe Tajvanit

Pse Kina dhe Tajvani kanë marrëdhënie të tensionuara? Kina dhe Tajvani janë ndarë gjatë luftës civile më 1940, mirëpo Pekini insiston se ishulli do t’i kthehet dikur. Si qeveriset Tajvani? Ky ishull ka kushtetutën e vet, liderët e zgjedhur në mënyrë demokratike, dhe rreth 300,000 trupa aktive ushtarake në mesin e forcave të armatosura.

Kush e njeh Tajvanin? Vetëm pak shtete. Shtetet e Bashkuara nuk kanë lidhje zyrtare me Tajvanin, mirëpo kanë një ligj që parasheh dërgimin e mjeteve që i duhen ishullit për ta mbrojtur veten.

Top Channel