“Taktika e Vuçiqit”/ Profesori tregon pse Serbia nuk nënshkruan marrëveshje me Kosovën – jep këto detaje!

Bisedimet mes Kosovës dhe Serbisë po vazhdojnë të jenë aktuale.

Një marrëveshje finale duket larg të ndodhë kjo sepse Vuçiq nuk po nënshkruan asnjë marrëveshje.

Së fundmi është kryeministri i Kosovës, Albin Kurti, ka thënë se presidenti serb, Aleksandar Vuçiq, nuk po e nënshkruan Marrëveshjen e Brukselit, me qëllim që sipas tij, ta lërë të hapur një mundësi për t’u kthyer në Kosovë.

E në lidhje me këtë temë në një prononcim për “Bota sot”, ka folur profesori universitar Enver Bytyçi.

Ai përmend marrëveshjen në Ohër që nuk u nënshkrua në pala serbe ani pse Kurti ishte i gatshëm për nënshkrim.

“Kosova dhe Serbia janë pajtuar në Bruksel për një marrëveshje normalizimi dhe në Ohër për aneksin e radhës së punës për zbatimin e saj. Kjo ka ndodhur në shkurt dhe në mars të vitit të kaluar! Por as marrëveshja dhe as aneksi nuk u nënshkruan nga pala serbe, saktësisht nga presidenti i Serbisë, Aleksandër Vuçiq. Ne e kujtojmë atë skenë përgjigjeje nga ana e kryetarit të shtetit serb, kur thoshte se “Dorën e djathtë e kam të sëmurë edhe për katër vitet e ardhshme”! Ishte një tallje cinike me të dyja ato dokumente, para së gjithash me BE-në dhe me ndërmjetësit e pranishëm, Borrell, Jajçak dhe Escobar. Në Ohër ishte i pranishëm edhe Aleks Sorosi. Nuk e di pse! Dhe nuk dihet nëse kishte ardhur ta inkurajonte ose jo Aleksandër Vuçiq në refuzimin e tij për nënshkrim”, u shpreh ai.

Më tej, profesori thotë që konfirmimi që Borrell mori nga 227 kryetarët e shteteve dhe kryministrëve të BE-së nuk vlen është vetëm lëvizje hipokrite.

“Por ama kryeministri i Kosovës, zoti Kurti, ishte i gatshëm t’i nënshkruante ato dokumente. Pavarësisht kësaj ndërmjetësit europianë thanë se edhe premtimi verbal vlen për BE-në. Me qëllim që ta legjitimonin marrëveshjen dhe aneksin për zbatimin e saj Borrell mori konfirmimin e 27 kryetarëve të shteteve dhe kryeministrave të BE-së. Por sa vlen ky konfirmim? Për mendimin tim është thjesht një lëvizje hipokrite, sepse Këshilli Europian nuk ka tagër t’i imponohet Serbisë. Thjesht mund ta bllokojë ne rrugën e integrimeve europiane. Por edhe kjo vështirë se do të ndodhë, sa kohë që Franca është lokomotivë e BE-së”, thotë ai.

Taktika e Vuçiqit

Nga ana tjetër profesori thekson që për shkak të arsyjeve më nalt të cekura Vuçiq nuk nënshkruan marrëveshjen në Bruksel.

“Kjo është arsyeja kryesore pse Vuçiq nuk e nënshkruan marrëveshjen e Brukselit dhe aneksit e Ohrit. Ai e di se nënshkrimi është obligim, premtimi nuk është obligim. Madje premtimi është një gënjeshtër serbe e radhës për arsye “patriotike”, siç thoshte Dobrica Çosiq. Një rrenë në mënyrë kreative, me të cilën kreu i shtetit të Serbisë mburret! A e shihni si ua hodha atyre të BE-së! Kështu do të mburret ai. Dhe më pas do të justifikohet me krenari se “Unë gënjeva për të mbrojtur interesat e Serbisë”! Dhe e dini se si i mbron ai në këtë rast interesat e vendit të tij? Duke fituar kohë në protje të Godosë ose të Uliksit. Pra në pritje të një kohe më të mirë e më të favorshme për Serbinë e Rusinë.

Nëse vjen kjo kohë, Vuçiq synon të rivendosë sovranitetin serb mbi Kosovën. Këtë taktikë e ka ndjekur ai që kur bashkë me Milosheviçin aranzhuan ndërhyrjen e forcave ruse dhe pushtimin prej tyre të aeroportit të Prishtinës më 10-11 qershor 1999. Ata nënshkruan në Kumanovë të largohen prej Kosove. Por ndërkohë i kërkuan Rusisë të zevendësonte trupat serbe me trupat e saj në Kosovë. Besoj se ju kujtohet kjo tentativë pët ta ruajtur Kosovën nën sovranitetin e Serbisë, edhe pse nënshkruan kapitullimin në Kumanovë”, shpjegon ai.

Ratifikimi i marrëveshjes në parlamentin serb do të thoshtë obligim ndërkombëtar

Në bised e sipër profesori thotë që nënshkrimi do të thotë njohje ndërkombëtare dhe për këtë arsyje Vuçiq nuk e bën këtë gjë.

“Pikërisht me këtë strategji Serbia veproi në diskutimet për statusin e Kosovës dhe gjatë gjithë kohës së bisedimeve dhe dialogut të diktuar nga OKB e deleguar te BE. Gjithmonë kanë kërkuar sovranitet në Kosovë. Prandaj dhe qeveria dhe institucionet e Kosovës janë përqëndruar këto vitet e fundit që të përforcojnë këtë sovranitet. Një kërkesë që u bë nga Tirana për të lëshuar një milimetër sovranitet se “nuk bëhet hataja” e ka pikërisht këtu zanafillën. Te përmbushja e orekseve të Serbisë për ta sunduar s[ërishmi territorin e Kosovës. Kjo është arsyeja pse Vuçiq nuk nënshkruan.

Nënshkrimi do të thoshte njohje ndërkombëtare e Kosovës. Nënshkrimi do të duhej të ratifikohej në parlamentin e Serbisë, po ashtu të Kosovës. Por fjala është për Serbinë. Ratifikimi i marrëveshjes në parlamentin serb do të thoshtë obligim ndërkombëtar për te respektuar vullnetin e Kosovës për pavarësi, shtetësi dhe sovranitet e integritet territorial në të gjithë territorin. Si mund ta pranojë diçka të tillë një president si Aleksandër Vuçiq, i cili vazhdimisht ka luftuar me të gjitha mjetet e forcat e tij për t’u rikthyer në Kosovë ose për ta ndarë territorin e saj midis Serbisë dhe Shqipërisë”, shprehet ai.

Kërkesa e profesorit është që Kosova të mos lëshoj asnjë milimetër territor e sovranitet.

“Me këtë rast dua të them se qeveria dhe institucionet e Kosovës nuk duhet të lëshojnë asnjë milimetër territor e sovranitet. Kjo vlen edhe për pëerdorimin e dinarit serb në Kosovë. Nëse miqtë dhe aleatët e Kosovës duan që shteti dhe institucionet e Kosovës të lëshojnë përkohësisht në sovranitetin e tyre shtetëror, atëherë duhet një garanci minimale. Kjo garanci do të ishte që ta detyronin presidentin e Serbisë që të nënshkruantë Marrëveshjen e Brukselit dhe Aneksin e Ohrit. Pa nënshkrimin e këtyre dy dokumenteve dhe ratifikimin e tyre, Serbia nuk ka obligim për të respektuar sovranitetin shtetëror të Kosovës. Sa kohë që ajo nukl është e gatshme ta respektojë këtë sovranitet, aq kohë nuk mund të bëhet asnjë lëshim për të lëshuar në këtë drejtim”, tha ai.

Profesori thotë në fund që kërkesa e zotit Kurti që Vuçiq ta nënshkruajë atë marrveshje dhe aneksin e saj i ndihmon më pas dialogut të brendshëm për të shkuar hap pas hapi në ushtrimin praktik të sovranitetit shtetëror.

“Kërkesa e zotit Kurti që Vuçiq ta nënshkruajë atë marrveshje dhe aneksin e saj i ndihmon më pas dialogut të brendshëm për të shkuar hap pas hapi në ushtrimin praktik të sovranitetit shtetëror të Kosovës në të gjithë territorin e saj. Ndryshe lëshimet do të shiheshin si dobësi dhe inkurajim i Beogradit për t’u rikthyer në Kosovë sërishmi si pushtues e dhunues”, përfundoi profesori Bytyçi për “Bota sot”.