“Të hetohet e gjithë kupola e shtetit!”, xhaxhai i Aleks Nikës për News24: Politika të mos ndikojë te drejtësi! Nuk dorëzohemi deri në fund

Xhaxhai i Aleks Nikës, një nga viktimat e “21 janarit” ka reaguar në lidhje me regjistrimin e procedimit nga SPAK.

Mark Nika tha në një komunikim me telefon për gazetarin e News24, Igli Çelmeta se tashmë duhet të bëhet drejtësi për “21 janarin”, ndërsa ka bërë thirrje që politika të mos ndikojë në drejtësi.

Ai ka shtuar se duhet të hetohet e gjithë kupola politike dhe se nëse nuk bëhet drejtësi për 21 janarin, sistemi i drejtësisë është i rënë.

“Besojmë se tashmë SPAK duhet të bëjë drejtësi për 21 Janarin. SPAK duhet të hetojë nga fillimi deri në fund 21 Janarin me objektivitet dhe i pandikuar nga politika. SPAK nisi hetimin pas urdhrit nga Gjykata e Lartë dhe Gjykata Evropiane. Kërkojmë drejtësi dhe nuk do të dorëzohemi deri në fund. SPAK duhet ta hetojë sa më shpejt 21 Janarin, provat janë aty.

Duam drejtësi, të hetohet e gjithë kupola e shtetit, 21 janarin është krim shtetëror. Kemi paditur ish-kryeministrin Berisha në atë kohë, ish ministrin e Brendshëm Lulzim Basha dhe ish kreun e Gradës Ndrea Prendin. Nëse nuk bëhet drejtësi për 21 janarin, sistemi i drejtësisë është i rënë. Thirrje politikës mos të ndikojë te drejtësia. Kemi besim te SPAK”, u shpreh ai.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb