Të mitur u qëlluan në kokë e në gjoks gjatë operacionit izraelit në Xhenin, thonë monitoruesit (fotot)

Një i mitur i vrarë gjatë operacionit të ushtrisë Izraelite në Xhenin ishte qëlluar me plumb në kokë, kurse një tjetër kishte marrë një plumb fatal në gjoks.

Një fëmijë i tretë ishte varë nga një raketë e lëshuar nga mjetet ajrore izraelite në kampin e refugjatëve të Xhenin, tha Ayed Abu Eqtaish, drejtues i grupit Defence for Children International-Palestine.

Ata ishin mes 10 njerëzve të vrarë dy ditët e fundit, në atë që zyrtarët palestinezë thonë se është një nga operacionet më të mëdha ushtarake të Izraelit në tokat e pushtuara të Bregut Perëndimor.

Abu Eqtaish tha për gazetarët se njerëzit janë “të bllokuar në kampin e refugjatëve” dhe daljet janë të gjitha të mbyllura.

Ai shton se vetëm Gjysmë-Hëna e Kuqe mund të evakuojë të plagosurit ose trupat e viktimave, të cilët edhe ato kanë raportuar pengesa për të arritur te njerëzit në nevojë.

Organizata Botërore Shëndetësore tha se grupet e ndihmës së shpejtë kanë hasur pengesa për të hyrë në kamp, por një zëdhënës izraelit tha se nuk ka urdhra të tilla dhe se ushtria por “koordinon hyrjen e ambulancave”.

Informacionet e mbledhura nga vendasit dhe gazetarët në kamp, thonin se dy fëmijë kanë vdekur nga plumbat e ushtrisë dhe një nga sulmet ajrore, por rrethanat e sakta të vdekjeve të të miturve nuk janë ende të qarta.

Rreth 3,000 njerëz janë evakuar tashmë nga kampi me rreth 14,000-refugjatë, që sipas Abu Eqtaish, është bërë objekt “bombardimesh të shumta”,  në atë që Izraeli ka quajtur “operacion i gjerë anti-terrorizmi”.

Top Channel