Vuçiqi në Kosovë, sikur Putini në Ukrainë, gazetarja ukrainase jep ‘parashikim’/ Ja çka mund të ndodhë nëse humbë Ukraina

Serbia dhe Rusia njihen për afërsinë dhe mbështetje të njëra- tjetrës, ndërsa tani ekzistojnë paralajmërime se Serbia mund të veprojë në Kosovë ashtu sikur veproi Rusia në Ukrainë.

Ish-gjenerali i NATO-s, Wesley Clark, ka thënë gjatë një interviste në CNN se nëse ka problem në Ukrainë, mund të vijë problemi edhe në Ballkan.

Kjo pasi ai ka thënë se Serbia është dora e Rusisë në Ballkanin Perëndimor.

Ai dha një intervistë bashkë me kryeministrin e Kosovës, Albin Kurti, i cili tha se “Serbia dhe Rusia imitojnë njëra tjetrën”.

Në të njëjtën linjë ishte Clark, duke thënë se presidenti serb Aleksandër Vuçiq, përkundër se përdor dy anët, perëndimin e Rusinë, ai në një moment dëshiron ta bëjë atë që presidenti rus Vladimir Putin po bën në Ukrainë.

“Dora e Rusisë ndihet në Ballkan, Serbia është dora e Rusisë në Ballkan dhe i shërben interesave të Rusisë. Vuçiq është i mençur, dëshiron të duket sikur po luan në dy anët, por kur të vjen koha ai do të bëjë atë që do Putini që ai të bëjë”, ka thënë ai.

“Kemi parë shumë dhunë, vrasje në 30 vjetët e fundit dhe kemi menduar se NATO-ja e ka ndaluar, por nëse ka probleme në Ukrainë ai problem do të vijë në Ballkan dhe liderë, si kryeministri Kurti, duhet të përballen me të”, ka thënë ndër tjerash Clark.

Për rrezik të një lufte në Kosovë dhe veprim të njëjtë sikur Putini në Ukrainë ka folur për “Bota sot”, gazetarja ukrainase, Marina Loseva, e cila thotë se probaliteti i një sulmi të tillë është pothuajse zero.

Sipas tij, Serbia nuk ka partnerë të fortë që janë të gatshëm ta mbrojnë atë në një konfrontim ushtarak.

“Probabiliteti i një sulmi të tillë është pothuajse zero, për mendimin tim. Për të nisur një agresion kundër një vendi fqinj, duhet të ketë burime të mëdha dhe besim se populli i atij vendi është i ndarë politikisht dhe mendërisht, se populli dhe qeveria janë në opozitë dhe të pakënaqur me situatën aktuale ekonomike dhe se. Vendi fqinj nuk ka partnerë të fortë që janë të gatshëm ta mbrojnë atë në një konfrontim ushtarak. Asnjë nga sa më sipër nuk mund të thuhet për Kosovën.

Për 25 vjet të pavarësisë së saj, Kosova u ka treguar vendeve fqinje kapacitetin e saj ekonomik dhe politik, ka forcuar marrëdhëniet e partneritetit me vendet anembanë botës dhe po ecën me besim drejt Bashkimit Evropian. Paqja në Kosovë është nën mbrojtjen e ushtrisë së NATO-s dhe kjo është një garantues shumë i fuqishëm i sigurisë”, shprehet Loseva.

Sipas gazetares ukrainase, vendet e Evropës dhe SHBA-të duhet të ndajnë ndihmë financiare për Ukrainën në luftën kundër agresorit, pasi kështu mund t’ua “zgjidhë duart” vendeve të tjera të ish- perandorive.

“Jo vetëm Serbia, por edhe vendet e tjera të ish-perandorive, vetëm një gjë mund t'ua "zgjidhë duart" - suksesi i Rusisë në luftën në Ukrainë. Kjo është arsyeja pse vendet e Evropës dhe SHBA-të ndajnë ndihmë financiare për Ukrainën në luftën kundër agresorit. Problemi këtu është se çdo vend agresor është i sigurt se po bën mirë. Rusia ishte e para që kaloi kufijtë e Ukrainës dhe hap pas hapi shkatërron dhe vret njerëz, shkatërron dhe djeg gjithçka, sepse thjesht dëshiron t'i aneksojë territorin vetes, por pa ukrainas. Një vend i madh sulmoi një vend fqinj më të vogël dhe po e shkatërron pa mëshirë për 10 vjet. Ukrainasit nuk donin të luftonin, por ata duhet të mbrojnë tokën e tyre, shtëpinë e tyre. Ukraina nuk ka burime të pafundme, dhe jo njerëz të pafund, por Rusia gjithashtu ka burime, megjithëse të mëdha, por jo të pafundme”, pohon Loseva.

Bota nuk duhet të lejojë të humbasë Ukraina, kjo sepse sipas Losevës, pavarësia dhe integriteti i shumë vendeve të tjera mund të bien.

Tutje, ajo beson në fitoren e Ukrainës.

“ Nëse Rusia zhvat Ukrainën me një luftë të gjatë, ajo do të hapë "kutinë e Pandorës" dhe çdo vend tjetër më i madh do të jetë në gjendje të përballojë të pushtojë vendet më të vogla pa u ndëshkuar, t'i grabisë, të vrasë fëmijë të pafajshëm dhe të pasurohet në kurriz të territoreve të reja. A nuk tingëllon si Harmagedon? Bota nuk mund të lejojë që Ukraina të humbasë, sepse pas kësaj, si një "shtëpi letrash", pavarësia dhe integriteti i shumë vendeve të tjera, të cilat janë thjesht më të vogla në përmasa, nuk kanë armë bërthamore ose ndodhen gjeografikisht pranë vendit. , do të bien në luftërat dhe ambiciet e vendeve perandorake. Tani për tani, Ukraina vepron si mburojë për vendet evropiane dhe sakrifikon më shumë sesa financat dhe mjetet teknike - është jeta e njerëzve, e fëmijëve, që nuk ka asnjë çmim, përveç çmimit të lirisë dhe pavarësisë së vendit të vet, të shtëpisë. Unë besoj në Fitoren e Ukrainës, sepse çdo vend ka të drejtën e pavarësisë dhe integritetit, dhe qytetarët e tij për një jetë të lumtur dhe paqësore”, përfundon Loseva.