Zyrtari i lartë i sigurisë në Ukrainë thotë se pritjet e kundërofensivës nuk u realizuan

Shpresat e Ukrainës për një kundërofensivë nuk janë realizuar, kështu të paktën ka pretenduar zyrtari i lartë i sigurisë Oleksiy Danilov, i cili koordinon kabinetin e luftës, shkruan BBC.

“Kjo nuk do të thotë se fitorja nuk do të jetë e jona”, shton ai, transmeton Telegrafi.

Kievi aktualisht po përpiqet të tërheqë paketa të reja ndihme perëndimore, veçanërisht në SHBA. Danilov beson se të paktën disa mjete ushtarake “me siguri do të vijnë”.

Në maj, në prag të kundërofensivës, Danilov i tha BBC-së se muajt e ardhshëm përfaqësojnë një “mundësi historike”.

Duke u kthyer në këto fjalë tani, ai tha: “Në maj, çdo qytetar i vendit tonë donte që lufta të përfundonte shpejt. Kishte shpresa, por ato nuk u realizuan. Fakti që ne mbrojtëm vendin tonë për dy vjet është tashmë një fitore e madhe”.

Forcat ukrainase shpresonin të rimarrin pjesë të territorit të pushtuar nga Rusia në pushtimin e shkurtit 2022, si dhe të shkurtonin linjat ruse të furnizimit në Krime.

Por duke mos pasur epërsi ajrore dhe duke u përballur me një mbrojtje të fortë ruse, përpjekjet e tyre duket se kanë ngecur në dimër.

Danilov tani ka pranuar se ata ishin shumë optimistë.

“Njerëzit bëjnë gabime ndonjëherë. Nuk mund të jesh i shkëlqyeshëm gjatë gjithë jetës”, tha ai.

Ai e përshkroi situatën aktuale në vijën e frontit si “shumë të vështirë” dhe tha se “tekstet” e vjetra për luftën – përfshirë ato të NATO-s, “duhen kthyer në arkiva”.

“Nuk ka pasur luftë si kjo në vendin tonë – as në shekullin e 20-të dhe as në shekullin e 21-të. Mund të them me siguri se nuk do të ndalemi. Ne do të vazhdojmë të luftojmë për lirinë tonë, për pavarësinë tonë”, thotë ai.

Në Ukrainë, theksi i ri është vënë në vendosjen e linjave mbrojtëse për dimër. Rusia besohet se po rrethon qytetin e Avdiivka dhe po bën presion për të marrë kontrollin e plotë të Marinkës aty pranë në rajonin e Donetskut.

“Vonesat e ndihmës amerikane nuk janë tragjedi”

Danilov është jashtëzakonisht i sigurt se ndihma e mbrojtjes së SHBA-së do të miratohet, por nuk pranoi të japë numra se çfarë mund të shpresojë Ukraina.

“Nëse ndodh që të marrim një dhuratë para Krishtlindjeve, do të jemi të kënaqur me këtë. Por nëse kjo ndodh pak më vonë, atëherë nuk duhet të bëjmë një tragjedi prej saj”, tha ai.

I pyetur nëse Ukraina do të humbë luftën nëse mungon ndihma e SHBA-së, ai refuzoi ta pranojë këtë mundësi sepse, siç thotë ai, “e vërteta është në anën e tyre”.

“A do të na shkatërrojë Putini para syve të njerëzimit? A do të vrasë fëmijët, gratë, të moshuarit tanë? Dhe a do të shikojë e gjithë bota me sy mbyllur? Atëherë duhet të shtrohet pyetja, në çfarë bote jetojmë”, tha ai.

Danilov hodhi poshtë gjithashtu raportet për tensione midis presidentit Volodymyr Zelensky dhe Komandantit Suprem të Ukrainës, Valeri Zaluzhny.

“Nuk konfirmoj që gjëra të tilla që po artikulohen sot në media janë reale”, tha ai. /Telegrafi/