Afera ‘Partizani’/ Këshilli i Mandateve shqyrton sot kërkesën e SPAK për arrestimin, Berisha thërret protestë! Policia blindon Kryesinë e Kuvendit

Këshilli i Mandateve mblidhet sot, 18 dhjetor, në orën 12:00 në Kryesinë e Kuvendit për të marrë në shqyrtim kërkesën e SPAK, që kërkon dhënien e autorizimit për arrestimin e ish kryeministrit Sali Berisha për aferën Partizani. Paralel me këtë zhvillim, para kryesisë së Kuvendit, Rithemelimi ka thirrur protestë, të cilën Sali Berisha vetë refuzon ta quajë thirrje në mbrojtje të tij.

Ndërsa pritet nisja e protestës, Policia është në gatishmëri dhe ka blinduar ambientet e Kuvendit. Berisha ende nuk e ka qartësuar nëse do të jetë para Lindita Nikollës dhe 4 socialistëve të tjerë, anëtarë të Këshillit të Mandateve për të bërë mbrojtjen e tij, apo nëse do të dërgojë një mbrojtës ligjor.

‘Do të pyes avokatët!’- tha Berisha.

Në pikëpyetje, është edhe prezenca e anëtarëve të opozitës në Këshillin e Mandateve, pasi 4 nga 5 prej tyre, Gazment Bardhi, Greta Bardeli, Ervin Salianji dhe Saimir Korreshi janë pjesë e aksionit të nisur prej disa muajsh në parlament, e mund të jetë pikërisht ky argument, që mund të përdoret prej tyre për të mos marrë pjesë në mbledhje.

Gjithsesi, Këshilli i Imunitetit nuk rrezikon kuorumin edhe nëse të gjithë deputetët e opozitës do të vendosin të mos marrin pjesë në shqyrtimin e kërkesës së SPAK për arrestimin e Berishës. Sipas rregullores së Kuvendit, Këshilli mblidhet edhe me vetëm 5 anëtarë, aq sa janë përfaqësuesit e PS, por Report Tv mësoi se edhe Enkeleid Alibeaj do të jetë i pranishëm.

Protesta do të vazhdojë edhe të enjten, kur me gjasë, do të votohet në seancë plenare dhënia e autorizimit për arrestimin e ish-kryeministrit, nëse socialistët nuk do të nxitojnë të thërrasin një seancë të posaçme më parë. Edhe në seancën e votimit, pikëpyetja është vota e opozitës, në kushtet kur PS ka konfirmuar votën pro, PD zyrtare është shprehur pro përmes deklaratave, por pa qartësuar prezencën në seancë, ndërsa deputetët e Berishës dhe Bardhit kanë kushtëzuar votën me plotësimin e kërkesave të tyre në parlament.

Ndërkohë për t’i shpëtuar arrestimit, Berisha ka kthyer sytë edhe nga Gjykata Kushtetuese, të cilës i kërkon rrëzimin e vendimit të parë të GJKKO-së e pezullimin e të gjithë të tjerëve që rrjedhin prej tij, në kushtet kur për detyrim paraqitje nuk u kërkua autorizim nga Kuvendi.