Protagonistët e ndeshjes me Çekinë u shprehën të kënaqur për atë që dhanë në fushë.
Trajneri Sylvinho tha se përveç rëndësisë së pikës ai vlerësoi edhe mënyrën se si e ndjenë këtë takim lojtarët.
“Jemi në gjysmën e rrugës. Ishte e rëndësishme që dolëm me 1 pikë, pasi nuk i lejuam të merrnin 3 dhe qëndrojnë aty. Jam i kënaqur jo vetëm për pikën, por edhe për të gjithë lojtarët se si e përjetuan ndeshjen”.
Padyshim që goli i Nedim Bajramit përveç pikës që solli ishte shumë i bukur për mënyrën se si u godit.
“Asani e fitoi duelin, e pashë që kisha hapësirë dhe godita topin shumë mirë, besoj që është goli më i bukur në karrierën time”.
Tani është koha të mendohet për sfidën e radhës, atë me Poloninë, që mund ta afrojë ekipin me finalet e Europianit.
“Ishte një ndeshje shumë e mirë me pak fat dhe përqëndrim mund ta fitonim. Tani duhet të përgatitemi shumë mirë për ndeshjen e ardhshme, aty do të luajmë një pjesë të rëndësishme të kualifikimit”, tha portieri Etrit Berisha.
“Shpresoj që të jetë viti i duhur. Do të ishte diçka e bukur për të gjithë shqiptarët kudo që janë, për të gjithë ne”, u shpreh Berat Gjimshiti.
Shqipëria u mund 1 – 0 nga Polonia në sfidën e parë në Varshavë dhe fitorja do të ishte edhe një revansh përveç mundësisë për t’u larguar me pikë nga ky kundërshtar.
Tv Klan
Të ngjashme