“Burgosja e Salianjit, akt lufte ndaj PD”, Berisha paralajmëron: Protestë kombëtare dhe mosbindje civile më 6 tetor!

Kryetari i PD, Sali Berisha e konsideron “akt lufte” ndaj opozitës, burgosjen e deputetit Ervin Salianji. Nga shtëpia ku ndodhet në masë arresti prej 30 dhjetorit 2023, Berisha zhvilloi një konferencë online me gazetarët. Ai tha se data 6 tetor do të jetë dita e protestës kombëtare dhe nisja e mosbindjes civile.

Lideri i opozitës përsëriti gjithashtu kërkesën për qeveri teknike, si kushtin e vetëm, sipas tij, për zgjedhje të lira dhe të ndershme në 2025.

Sali Berisha: Arrestimi i deputetit Salianji është akt lufte ndaj nesh, por jo akti i parë i saj. Rama e shpalli me kohë luftë, që kur rrëmbeu flamurin e PD, më vuri në masën arrest me burg mua si kreun e PD, apo persekutoi Metën. Jam sot para jush për të deklaruar se PD do t’i përgjigjet këtij akti lufte me qëndresën më të fuqishme qytetare, me mosbindje civile, se kjo parti nuk shmang proceset zgjedhore e as kalon në klandestinitet por do të përdorë trimërinë e mijëra anëtarëve për t’i dhënë përgjigjen e meriuar mafies Rama-Xhafa, që të realizojë atë që në pamje të parë duket si mision i pamundur.

Do të realiojmë përmbysjen e kësaj ngrehine droge e krimi. Do të sigurojmë zgjedhje të lira me qeveri teknike. O sot o kurrë, demokratët janë të ftuar t’i përkushtohemi me çdo gjë kësaj beteje vendimtare për fatin e PD, fatin e opozitës dhe pluralizmit e fitoren mbi krimin e mafies, vendimtare për fatin e Shqipërisë. 6 tetori do të jetë protestë kombëtare dhe mosbindje civile.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb