Debat në grupin e PD për bilbilat/ “Rithemelimi” diskuton skenarët për mosbindjen, anashkalon Bashën për Zgjedhoren

Mosbindja civile do të shfaqet edhe këtë të enjte në parlament, por 24 orë para zbatimit të skenarit bllokues në seance plenare, mes demokratëve pati zëra ndryshe. I pari ishte Agron Gjekmarkaj i cili kërkoi në mbledhjen e grupit ndryshim kursi, radikalizim ose kthim në normalitet.

“Jemi 4 muaj  në këtë aksion. Duhet  të bëjmë kujdes për këtë sjellje. Nëse kemi qenë entuziastë, do duhet të kemi kujdes të mos na kthehet e kundërta. Mendoj se do duhet të marrim një vendim. Kështu nuk vazhdohet. Ose ta radikalizojmë ose ta kthejmë në normalitet duke i qëndruar kauzës tonë. Jemi para padrejtësive, por ne do duhet të flasim për to. Mendoj se duhet të kapërcejmë këtë situatë dhe ta marrim një vendim çfarë do bëjmë”.

Idenë e Gjekmarkajt e mbështeti edhe Xhelal Mziu, i cili propozoi që të gjenden rrugëdaljet nga kjo situatë dhe që deputetët të rikthehen në terren.

Por, për deputetet që ndjekin linjën e Sali Berishës, mosbindja duhet të vijojë për sa kohë socialistët nuk pranojnë kërkesat e opozitës.

“Mosbindja vijon”, theksoi Flamur Noka.

Reforma Zgjedhore do të jetë kryefjalë e aksionit opozitar për sa kohë grupit kuvendor demokrat nuk merr atë që kërkon; uljen ne karrigen e reformës zgjedhore të Oerd Bylykbashit si bashkëkryetar.

“Në zbatim dhe të kërkesave të OSBE, kemi vendosur të ridërgojmë kërkesën për përbërjen e Komisionit të Reformës Zgjedhore”, tha Gazment Bardhi.

Formula e përbërjes, për të cilin flet Gazment Bardhit nuk parashikon Enkelejd Alibeajn në bashkëdrejtim. Edhe pse nuk negocion kryesimin e reformës, Gazment Bardhi është gati t’i bëjë një lëshim Lulzim Bashës. T’i japë një vend anëtari te thjesht në komisionin e posaçëm.

Propozimi i Bardhit mori mbështetjen edhe të deputetit  Ferdinand Xhaferraj, ndërkohë aleati Agron Duka kërkoi unifikim të qëndrimeve.

Top Channel