Dënimi i Salianjit nga Apeli/ Avokati mbrojtës: Pse nuk bëhet ballafaqimi i zërit të Geron Xhafajt me atë në audiopërgjim

Redi Ramaj, avokati i deputetit Ervin Salianji, i cili u dënua nga Gjykata e Apelit me 1 vit heqje lirie, në rubrikën “Opinion” në News24, i konsideroi si fabrikim provash ato që u përdorën për të dënuar deputetin demokrat.

Ramaj tha se pse nuk del Policia e Shtetit apo Prokuroria dhe të thotë që zëri në audio-përgjim nuk është i Geron Xhafajt.

“Le ta thonë, ose të vijë Geron Xhafaj dhe të thotë ky nuk është zëri im, le të bëhet një ekspertizë e dy zërave dhe të shihet, është apo nuk është. Këtu merr fund debati politik, kush është fajtori le të dënohet”, tha Ramaj.

Avokati tha se ndaj vendimit të Apelit do të bëhet një rekurs në Gjykatën e Lartë.

“Do të bëjmë betejën tjetër në Gjykatën e Lartë për të gjetur drejtësinë, në mënyrë që të mos kemi vendime politike, por të kemi vendime bazuar në prova dhe fakte.

Vendimet politike dëmtojnë shtetin ligjor dhe reformën në drejtësi”, tha Ramaj.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb