Dita më intensive e familjes Berisha/ Shkëlzeni dëshmitar për “Gërdecin”, ish-kryeministri në pritje të masës së arrestit, Argita në vijën e parë të protestës

Kjo për shkak se brenda kësaj dite do të vendoset për të ardhmen e Partisë Demokratike dhe fatin e Sali Berishës. Për këto arsye, kjo ditë duket se është edhe më intensivja brenda familjes së ish-kryeministrit.

E nisi i biri, Shkëlzen Berisha, i cili u thirr sërish të dëshmojë në GJKKO lidhur me dosjen e “Gërdecit” që po gjykohet prej vitesh aty.

Sikurse tha edhe ai “jo rastësisht në këtë ditë, në mëngjes thirret i biri, në drekë jepet masa e arrestit për të atin”.

Dita për Sali Berishën nisi në rrugë, por nuk dihet se ku do të përfundojë.

Ish-kryeministri thirri një protestë para Gjykatës së Lartë, aty ku pritet të jepet ndoshta vendimi më i rëndësishëm për politikën që ka marrë ndonjëherë kjo gjykatë, fati i vulës dhe logos së Partisë Demokratike.

Prej këtij vendimi do të mësohet përfundimisht nëse kjo vulë do t’i takojë Sali Berishën apo Lulzim Bashës.

Por ky nuk është vendimi më i rëndësishëm që pret Sali Berisha, kjo pasi ajo ku janë fokusuar sot të gjithë është sërish GJKKO-ja, e cila do të vlerësojë kërkesën e SPAK-ut që kërkon “arrest me burg” me mbikëqyrje policore për Sali Berishën.

Për t’iu rikthyer edhe njëherë familjes Berisha, sot nuk ka mbetur pas as e bija e ish-kryeministrit, Argita. Ajo është parë sërish sot në protestë para Gjykatës së Lartë, pasi sikurse thotë, ajo është mbështetëse e Partisë Demokratike, por pa ndonjë ambicie për ta drejtuar atë.

Me Shkëlzenin dëshmitar për “Gërdecin”, ish-kryeministrin në pritje të masës së arrestit dhe të bijën në vijën e parë të protestave të “Rithemelimit”, kjo duket të jetë dita më intensive brenda familjes Berisha.

Top Channel