Dramë futbollistike në Brazil/ Santos, ish-klubi i Pele bie pas 111-vitesh nga kategoria

Dramë futbollistike në Brazil. Santos, një nga klubet më të mëdha dhe më me emër në futbollin brazilian dhe jo vetëm, ka rënë për herë të parë në historinë e vet 111-vjeçare në serinë B të futbollit në këtë vend. Gjithçka ndodhi në përfundim të humbjes 2 me 1 ndaj Fortalezes në shtëpi.

Madje gjithçka u bë edhe më e rëndë po të kemi parasysh se goli i fitores së miqve që rrëzoi Santosin u shënua në minutën e 96. Klubi i emrave legjendë të futbollit brazilian, nga më i madhi Pele e deri te Neymar, e mbylli kampionatin më vetëm 38 pikë, duke u renditur në vendin e katërt nga fundi.

Kjo është padiskutim një ngjarje sportive për Brazilin dhe jo vetëm, pasi bëhet fjalë për një ekip shumë të titulluar që e ka fituar mes të tjerash 3 kupa libertadores, 8 kampionate, 2 kupa interkontintetale dhe dhjetëra trofe të tjerë kombëtarë dhe ndërkombëtare. Menjëherë pas disfatës që i çoi në serinë B, tifozët e Santos kanë pushtuar fushën duke u përplasur me policinë, e cila arriti t’i ndalë përpara se të nisnin vandalizmat në Sao Paolo.

Qindra mjete, autobusë e dyqane u shkatërruan, shumë persona u plagosën dhe të tjerë u ndaluan për ngjarjet e dhunshme që pasuan rënien dramatike të Santosit një kategori më poshtë. Ndërkohë duke qëndruar në Brazil, në të njëjtën ditë, rivalët e mëdhenj të Palmeiras u shpallen për herë të 12 kampion të vendit, për të cilën u mjaftoi një barazim 1 me 1 kundër Kruzeiros.