Elon Musk thirret në gjykatë, dha shpërblim prej 1 milionë$ për votuesit

Elon Musk është urdhëruar të marrë pjesë në një seancë gjyqësore të enjten, pasi miliarderi u padit nga prokurorët në Filadelfia për dhuratat e tij prej 1 milion dollarësh për votuesit. Si mbështetës i kandidatit republikan Donald Trump, Musk, përmes grupit të tij politik “America PAC”, ofroi çmime në para për votuesit e regjistruar në shtetet vendimtare, sipas raportimeve nga BBC.

Zyrtarët amerikanë kanë shprehur shqetësim se kjo mund të përbëjë shkelje të ligjit zgjedhor, një akuzë që Musk e mohon. Prokurori i qarkut të Filadelfias, Lawrence Krasner, ka theksuar se Musk “duhet të ndalet, menjëherë, përpara zgjedhjeve të ardhshme presidenciale.”

CNN raporton se Musk ka paraqitur një “mocion largimi” për të zhvendosur çështjen nga duart e shtetit në një gjykatë federale, një veprim që mund të vonojë procesin. Dokumentet e gjykatës tregojnë se gjyqtari Angelo Foglietta i Gjykatës së Qarkut të Filadelfias ka kërkuar që “të gjitha palët duhet të jenë të pranishme në kohën e seancës.”

Musk njoftoi më herët këtë muaj se do të jepte rastësisht një çmim prej 1 milion dollarësh për njerëzit në shtetet e betejës: Pensilvani, Gjorgjia, Nevada, Arizona, Wisconsin, Michigan dhe Karolina e Veriut.