Skenar i BIA-s serbe për zgjedhjet e 9 shkurtit? – Zbardhet “prapavija” e thirrjes së Gjuriqit për të mos e votuar Kurtin: Sondazhet..

Ministri i Jashtëm i Serbisë, Marko Gjuriq, dje në fjalimin e tij në Mbledhjen e Këshillit të Sigurimit të OKB-së, ku u diskutua për Kosovën, ka theksuar se Serbia nuk ka konflikt me shqiptarët në Kosovë, por me politikat dhe veprimet e kryeministrit Albin Kurti.

Gjuriq u ka bërë thirrje shqiptarëve në Kosovë që të refuzojnë politikat e përçarjes dhe konfliktit që sipas tij, vijnë nga ana e kryeministrit Kurti.

Ai e kritikoi kryeministrin Kurtin duke e quajtur atë një pasqyrë të regjimit që ai ka dëshiruar të luftojë para më shumë se një çerek shekulli.

“Për komunitetin shqiptar në Kosovë dua të jemi qartë, Serbia nuk ka konflikt me ju, çështja jonë ka të bëj me politikat dhe veprimet e regjimet të Albin Kurtit dhe jo shqiptarët. I kuptojmë aspirata e juaja për paqe dhe prosperitet aq sa duam t’i bëjmë të njëjtat për komunitetin serb. Iu kërkojmë që të refuzoni politikat e përçarjes dhe konfliktit dhe ta na bashkoni në kërkim të respektit të ndërsjellë mbarë sigurisë dhe bashkëpunimit. Albin Kurti është bërë një pasqyrë e regjimit te cilin ka dashur ta luftojë para më shumë se një çerek shekulli”, ka deklaruar ai në takimin e Këshillit të Sigurimit të Kombeve të Bashkuara.

Kjo deklaratë e Kurtit u komentua nga këndvështrime të ndryshme, veçanërisht nga segmentet opozitare që thanë se Gjuriqi ka dashur që të zgjojë një efekt të kundërt tek qytetarët e Kosovës për votimin e Kurtit.

Profesori i marrëdhënieve Ndërkombëtare dr. Enver Bytyçi e ka analizuar për gazetën “Bota sot” thirrjen e Marko Gjuriq për shqiptarët, që të mos votojnë Albin Kurtin dhe Vetëvendosjen, duke e konsideruar këtë një provokim të Serbisë për Kosovën.

Ai ka argumentiar se ky është një skenar i hartuar nga shërbimin sekret serb, që synon të homogenizojë serbët në Kosovë për të votuar Listën Srpska, si një mënyrë për të kundërshtuar "regjimin e Kurtit".

“Thirrja e Gjuriq gjatë seancës së KS të OKB që shqiptarët të mos votojnë zotin Kurti dhe Vetëvendosjen është një provokim i Serbisë për Kosovën. Mesa duket shërbimi sekret i Serbisë ka ndërtuar një skenar në kuadër të zgjedhjeve të 9 shkurtit të vitit të ardhshme. Unë shoh në këta skenarë, të cilët i janë dhënë politikës së Beogradit për zbatim, disa synime:

Së pari, me këtë deklaratë si dhe me kritikat që ia bëjnë presidenti i Serbisë të ashtuquajturit “Regjimi i Kurtit” u bëhet me dije votuesve serbë në Kosovës kush janë të preferuarit Serbisë në Kosovë dhe kush jo. Pra qëllimi është që të homogjenizohen serbët për të votuar Listën Srpska, si rruga e vetme për t’u mbrojtur nga “ky regjim”! Frika më e madhe e Beogradit për zgjedhjet parlamentare të nëntë shkurtit 2005 është humbja e mbështetjes nga serbët që jetojnë në Kosovë e sidomos të atyre në veri të saj. Kjo strategji mund të funksionojë në një farë mase, nëse serbët e Kosovës nuk do të bashkohen rreth politikanëve që e shohin të ardhmen e serbëve në shtetin e Kosovës”, u shpreh profesori.

Bytyçi thekson se ky mesazh gjithashtu u drejtohet shqiptarëve që besojnë se paqja me Beogradin është më e rëndësishme se territori, dhe ndihmon në forcimin e qëndresës së një grupi që është kundër qeverisë aktuale.

“Së dyti, mesazhi i Beogradit, presidentit dhe ministrit të Jashtëm, Gjuriq, u drejtohet jo pak shqiptarëve, në Kosovë, të cilët besojnë se më e rëndësishme është paqja me Beogradin, sesa territori i vendit. Fatkeqësisht kjo kategori shqiptarësh u rrit gjatë kohës së detantës në marrëdhëniet e Kosovës me Serbinë, kur thuhej “Hajde ta përzëmë Serbinë e t’ia japim veriun asaj”! Këta shqiptarë janë të fiksuar rreth politikave të shkuara në Kosovë dhe janë të gatshëm të thërrasin në ndihmë edhe autoritetet e Beogradit për ta rrëzuar qeverinë Kurti. Qeveria Kurti mund të rrëzohet, por jo pse këtë e kërkon Serbia. Ajo mund e duhet rrëzuar nëse shqiptarët vlerësojnë se “Qeveria e Albin Kurtit nuk është e dobishme për interesat e Kosovës dhe të qytetarëve të saj”! Një thirrje si kjo u bë më 21 prill 2021 edhe për Shqipërinë. Ishte vetë kreu i shtetit të Serbisë, ai që katër ditë para zgjedhjeve parlamentare të 25 prillit 2021 bëri thirrje që “shqiptarët të mos votojnë nacionalistët e Partisë Demokratike të dominuar (asokohe) nga Sali Berisha, por të votojnë Partinë Socialiste të Edi Ramës. Ajo thirrje funksionoi në atë kohë. Sepse edhe në Shqipëri ka jo pak nga ata shqiptarë që e shohin “vëllazërim-bashkimin” me Serbinë si kusht të progresit të saj. Eshtë sëmundje e hershme kjo, por e konsoliduar dy herë në histori, në vitet 1941 – 1948 dhe në këto 12 vitet e fundit të pushtetit të Rilindjes”, thekson ai.

Profesiori gjithashtu ka nënvizuar se thirrjet e Beogradit kanë për qëllim të influencojnë edhe ndërkombëtarët, duke i bërë ata të besojnë se qeveria e Kurtit është e pabesueshme për dialogun.

“Së treti, nuk duhet të harrojmë se thirrjet e Beogradit për të mos votuar Albin Kurtin u drejtohen më së shumti ndërkombëtarëve. Thirrja e fundit e Gjuriq u bë në prani të ambasadorëve të vendeve anëtare të Këshillit të Sigurimit, pra të forumit më të lartë në nivelin global. Çfarë përçojnë këto thirrje te ndërkombëtarët? Me këtë thirrje Vuçiq, Gjuriq e të tjerë u thonë ndërkombëtarëve e sidomos atyre në Perendim, se “Ne nuk mund të punojmë me qeverinë e Albin Kurtit. Kurti është nacionalist radikal, i pabindur dhe për pasojë i pa kompromis. Pa kompromise, pra pa dhënë diçka Kosova për Serbinë, ne nuk do të jemi të gatshëm të zhvillojmë bisedime e dialog. Thirrja për ndërkombëtarët është e tillë “Mos e përkrahni fitoren e Kurtit dhe Vetëvendosjes, sepse këta nuk do t’i pranojmë për partnerë në dialog”!”, ka potencuar ai

Bytyçi paralajmëron se, nëse sondazhet tregojnë mbështetje për Kurtin, Beogradi mund të organizojë incidente për ta diskredituar atë.

“Kjo metaforë është shumë e lexueshme. Taktikisht Serbia luan në të gjitha drejtimet. Sa do të ketë sukses? Duhet të presim e ta shohim. Por unë besoj se duhet patur kujdes. Nëse anketimet dhe sondazhet do të flasin në favor të Kurtit, atëherë Beogradi mundet të organizojë edhe incidente të tilla, me të cilat të përpiqen të ulin autoritetin e qeverisë së sotme. Banjska ishte dezenjuar që ta diskreditonte qeverinë Kurti dhe institucionin e presidentes Osmani. Por ndodhi e kundërta, falë vigjilencës, profesionalizmit të policisë dhe bashkëpunimit me shërbimet partnere”, ka nënvizuar ai.

Profesori ka përfunduar analizën e tij, duke theksuar se qytetarët e Kosovës nuk do të votojnë për shkak të propagandës, por do të bazohen në veprat e politikanëve, duke theksuar nevojën për homogenizimin e vendimmarrjes në Kosovë për të forcuar shtetësinë.

“Kosova nuk është për herë të parë objekt i kësaj goditjeje. Kam lexuar që analistë në Kosovë ta interpretojnë thirrjen e Gjuriq si “ndihmë” dhe “dëshirë” të Beogradit për ta ndihmuar kryeministrin e Kosovës. Shpjegimi i tyre është në fakt jo racional, sepse thonë se “Kur të kritikon Serbia, atëherë të shtohen votuesit në Kosovë dhe këtë po e bën ajo edhe në rastin e Kurtit”! Disa thonë se “Kurti e serbët janë marrë vesh që të bëhen kritika, me qëllim që Kurti të forcohet në Kosovë”! Por fatkeqësisht, shqiptarët në Kosovë nuk votojnë pse ndërtohen narrativa joshëse. Ata shohin veprat dhe punët e politikanëve, më pas vendosin për votën e tyre”! Qytetarët e Kosovës nuk janë të ndikuar nga propaganda e Beogradit, prandaj nuk nisen nga narrativa e Lirimit për të gjykuar me logjikë.

Ka qenë një kohë kur Serbia punoi për ta dobësuar pozicionin e Presidentit Historik, Ibrahim Rugova. Edhe atëherë u mbështetën fuqishëm nga ana e Beogradit strukturat anti-Rugovë në Kosovë. Por spiunët e Serbisë nuk guxonin të dilnin te bulevardi i Prishtinës, jo më të përçonin idetë e Serbisë te qytetarët e saj! Rugova e pati homegjenizuar Kosovën aq shumë, sa Serbia nuk gjeti bashkëpunëtorë aktivë. Këtë gjë duhet ta bëjë edhe Albin Kurti. Kushti për përmbylljen e shtetësisë dhe definimit të saj është homgjenizimi i Kosovës dhe qytetarëve të saj, duke i tërheq në vendimmarrjen homogjenizuese edhe serbët e Kosovës dhe pakicat e tjera”, ka përfunduar profesori.