Hoxhallari: Tirana gati për triumfin në derbi, ja çfarë na mungon

Erjon Hoxhallari shpreson që Tirana të përdorë sa më mirë faktin që Partizani ka mungesa në këtë derbi. Në një intervistë për “Panorama Sport”, mbrojtësi i bardhebluve analizoi sfidën ndaj Erzenit dhe pohoi faktin se skuadra u mund me një gjuajtje në portë.hoxhallari

Lojtari foli gjatë për sistemin difensiv dhe çfarë pritet nga ekipi i tij. Hoxhallari kritikon edhe një herë tjetër lojën që bën skuadra në mbrojtje, por pranoi se derbi e ringjall skuadrën. Lojtari deklaroi se grupit i mungon kompaktësia që ka pasur në dy sezonet e fundit në Superiore. Këtë sezon Erjon Hoxhallari ka 998 minuta dhe 12 takime. Mbrojtësi është një nga titullarët e padiskutueshëm dhe ka munguar vetëm në një sfidë ku ishte me katër kartonë të verdhë.

Ju jeni një lojtar që e njihni mirë futbollin. Përse kjo skuadër është me oshilacione?

Mund të them që është lidhja që mungon. Ajo kompaktësia që nuk është siç ka qenë në dy vitet e mëparshme, në të cilat Tirana ishte në krye të klasifikimit dhe në luftën për titullin kampion.

Çfarë ka më shumë Tirana në krahasim me Partizanin?

Tani kjo ndeshje është llogaritje e secilës palë. Një ndeshje e paparashikueshme. I ka të tria rezultatet brenda dhe mund të ndodhë gjithçka. Partizani ka mungesa në ekip. Në fund shpresojmë që këto mungesa të na shërbejnë ne për të qenë superiorë në fushën e lojës dhe ta fitojmë këtë sfidë.

Keni humbur në sfidën e parë derbi ndaj Partizanit. Mendoni se do të jetë një sfidë ndryshe?

Derbet pothuajse janë të gjitha njëlloj. Shpresoj që eksperienca jonë në ndeshjet e kaluara dhe në skuadër, të bëjë diferencën dhe të zgjidhë ndeshjen. Shpresoj që në stadium të ketë sa më shumë tifozë, siç i ka hije tifozërisë bardheblu./PANORAMASPORT.AL