Jordi Alba tek Inter Miami

Presidenti i klubit të MLS, Mas tha se ish-mbrojtësi i Barcelonës ka nënshkruar kontratën

Mbrojtësi spanjoll Zhordi Alba do t’i bashkohet Lionel Messit tek Inter Miami. Zhorge Mas, presidenti i klubit të Major League Soccer tha se skuadra do të përforcohet me ish-mbrojtësin e Barcelonës.

34-vjeçari vendosi që të largohej nga Barcelona me përfundimin e sezonit, ku luajti 450 ndeshje me blaugranat, fitoi Ligën e Kampionëve në 2015, gjashtë tituj të La Ligës, pesë tituj të Copa del Rey, katër Superkupa spanjolle dhe Kupën e Botës për Klube.

Alba gjithashtu ka luajtur në 90 ndeshje me përfaqësuesen spanjolle. Tek Inter Miami, ai do të gjejë Leo Messin dhe Serxho Buskets, me të cilët ka arritur shumë suksese te blaugranat.

Mas tha se futbollisti ka nënshkruar kontratën dhe do të mbërrijë në Miami brenda pak ditësh e do të jetë në dispozocion të trajnerit, Gerardo Martino.

Klubi nga Florida po punon që të firmosë me një tjetër ish-lojtar të katalanasve, Luis Suarez, i cili aktualisht është pjesë e Gremios në Brazil. Bashkëpronari tha se bisedimet kishin ndodhur, por ai respekton faktin që uruguaiani është në pronësi të një tjetër klubi.

Klan News

Të ngjashme