Manja: Të hapur për amnistinë, por s’mund të falen protestuesit që kanë shkatërruar pronën

Pasi dështuan të bëjnë 84 vota në Kuvend për amnistinë penale, socialistët janë gati të ulen në diskutime me opozitën dhe Lulzim Bashën duke pranuar amendimet e kësaj të fundit për projektligjin, me kushtin që ato të jenë në përputhje me parimet e faljes.

“Basha ka sjellë ca amendamente në Komision dhe thotë të amnistojmë protestuesit 2008-2020 dhe jo të tjerët. Po këta të 8 Janarit që protestuan te godina e PD, këta të Rithemelimit që protestuan në mënyrë të paligjshme kundër Lulzimit atje. Këta të mos i amnistojmë? Jemi gati të ulemi të bisedojmë, por nuk pranojmë kushte për një gjë që nuk na takon vetëm ne”, tha Manja.

Nga Vlora, ministri i Drejtësisë ritheksoi se nga amnistia penale nuk përfiton asnjë zyrtar i dënuar nga Gjykata e Posaçme e Apelit për Korrupsionin dhe Krimin e Organizuar.

“Nga kjo amnisti nuk amnistohet korrupsioni, shpërdorimi i detyrës dhe asnjë i dënuar nga GJKKO dhe i hetuar nga SPAK”, tha Manja.

Manja sqaroi se projektligji nuk do të rikthehet për rishqyrtim në Komisionin e Ligjeve dhe se do të futet për votim në seancë plenare vetëm pasi socialistët të bëjnë 84 votat e nevojshme që duhen për miratimin e amnistisë penale.

“Kur të sigurohen votat të futen në rendin e ditës”, tha ai.

Nga projektligji i amnistisë penale përfitojnë rreth 700 persona të dënuar dhe 2500 të tjerë në shërbim prove. Kategoria që përfitojnë ulje shkojnë nga 1200 në 1600 të dënuar.

Tv Klan

Të ngjashme