Mbi 5 tonë peshk i ngordhur pushton brigjet e rezervuarit të Petovës në Fier, burim për infeksione

Mbi 5 tonë peshk i ngordhur kanë pushtuar brigjet e rezervuarit të Petovës në bashkinë Fier. Era e rëndë ka pushtuar zonën përreth ndërkohë që kafshët po ushqehen me peshkun e ngordhur e në këtë mënyrë si pasojë e temperaturave të larta mund të kthehen në burim epidemie. Banorët pranë rezervuarit nuk flasin për median pasi jashtë kamerave thonë se rezervuarin e zotëron bashkëfshatari i tyre i cili e ka marrë me qira për 99 vjet.

Agjencia Rajonale e Ruajtjes së Mjedisit e kontaktuar me telefon në lidhje me këtë problematikë ka pohuar se e dinë problemin por nuk është kompetencë e tyre sepse këtë kontroll e ushtron Ministria e Mjedisit. E njëjta përgjigje vjen edhe nga AKU, Drejtoria e Peshkimit dhe Drejtoria e Ruajtjes së Mjedisit në bashkinë Fier.

Ferrik Avdia, drejtor i bujqësisë në bashkinë Fier ka pohuar se kjo është hera e parë që ndodh një situatë e tillë për shkak të temperaturave të larta e rënia e nivelit të ujit në rezervuar. Po ashtu është vënë në dijeni dhe dijeni Ministrinë e Mbrojtjes Mjedisit, drejtoritë përkatëse, policia dhe i është lënë detyrë personit që ka marr me qira rezervuarin që të nxjerri të gjithë sasinë e peshkut të ngordhur e ta largojë nga rezervuari.
Një situatë e njëjtë ndodhi dy muaj më parë në rezervuarin e Kurjanit në Rroskovec ku tonelata peshku të ngordhur pushtuan anët e rezervuarit e ndotën ambientin. Pas kronikave televizive organet përkatëse morën masa për largimin e tij e rikthimin e situatës në normalitet.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb