Mesazhi fantastik i yllit të Man United pasi Kroos njoftoi për pensionim nga futbolli

Kapiteni i Manchester United, Bruno Fernandes, i bëri një nderim të përzemërt legjendës gjermane Toni Kroos, pasi ky i fundit njoftoi se do të pensionohet nga futbolli pas përfundimit të Euro 2024.

Sot (e martë), mesfushori i Real Madridit njoftoi se ka vendosur që t’i ‘var këpucët në gozhdë’ pas përfundimit të Euro 2024.

Teksa Kroos po i jep fund një karriere magjike, ylli i Unitedit dhe Portugalisë, Fernandes, i ka çuar një mesazh të përzemërt lojtarit ikonik të Real Madridit.

Mesfushori i ‘Djajve të Kuq’ përmes një postimi në Instagram publikoi fotografinë e Kroosit me mbishkrimin: Njëri nga më të mirët e kësaj gjenerate! Çfarë kënaqësie ishte që të shihja juve duke luajtur këto vite.

Më herët gjatë këtij sezoni kishte pasur raportime se reprezentuesi gjerman do ta rinovojë kontratën e tij në ‘Santiago Bernabeu’ edhe për një vit tjetër, sidoqoftë 34-vjeçari i dha fund thashethemeve duke njoftuar se do t’i jap fund karrierës si futbollist profesionist.

Kroos ka fituar në total 21 trofe me ‘Los Blancos’ dhe ka mundësinë që ta shtojë në koleksionin e tij të trofeve edhe një Ligë të Kampionëve, teksa do të përballen me Borussia Dortmundin në finale me 1 qershor.

Gjermani do të kthehet në aksion përsëri të shtunën aty ku të besuarit e Carlo Ancelottit do të luajnë ndeshjen e fundit në ligë përballë shikuesve në ‘Santiago Bernabeu’./Telegrafi/