Messi optimist për të luajtur

Pasi zhgënjeu mijëra tifozë nga Hong Kongu duke mos luajtur në ndeshjen miqësore, Leo Messi la të hapur mundësinë për të luajtur në takimin Inter Miami-Visel Kobe në Tokio.

Lojtari tha në konferencë për shtyp se ndihej shumë më mirë. Kritikat kanë qenë të shumta për ekipin nga Florida si edhe organizatorët e miqësores në Hong Kong, me qeverinë vendase që tha se po shikonte mundësinë e vendosjes së penaliteteve. Ylli argjentinas u shpreh se i vjen keq që nuk luajti, por enjtja në muskulin e kofshës nuk e lejonte.

“E vërteta është se kam një ndjenjë shumë të mirë krahasuar me ditët më parë. Në varësi të saj se si do të shkojë stërvitja, do të shikojmë. Të tregohem i sinqertë, ende nuk e di nëse mund të luaj në miqësoren e Tokios. Por ndihem shumë-shumë më mirë dhe jam i paduruar ta bëj këtë”, tha Messi.

Tetë herë fituesi i “Topit të Artë” mori pjesë në seancën stërvitore të së martës. Shumë tifozë japonezë thanë se i kënaqte fakti që do të mund të shikonin një nga lojtarët më të mirë të botës në histori.

Klan News

Të ngjashme