Newcastle ‘shpresa europiane’ e Milanit

Përballja e radhës ndaj Njukasëll duhet fituar patjetër, teksa kalimi në 1/16-at do të garantohej duke e kombinuar edhe me një humbje të Pari Së Zhërme ndaj Dortmundit tashmë të kualifikuar. Francezët mbajnë shpresat për kualifikim pas barazimit në momentet e fundit të përballjes me Njukasëll. Kylian Mbappe shënoi golin me vlerën e një pike, për të zhvlerësuar atë të Isak, i cili u bë lojtari i parë i anglezëve që shënon në transfertë në një ndeshje të Champions League që prej vitit 2003.

Llogari të mbyllura në grupin G. Përmbysja spektakolare e Manchester City, 3-2 përballë Lajpzig dhe triumfi 2-0 i Jong Bojs ndaj Cërvena Zvezda bëri që të tre skuadrat të garantonin rrugëtimin në kompeticionet e UEFA-s. Kampionët në fuqi të kompeticionit treguan se këtë sezon do luftojnë për të mbrojtur titullin e sezonit të shkuar.

Për herë të parë, anglezët arritën të përmbysnin disavantazhin e dygolave në pjesën e parë, diçka që kishin dështuar për ta arritur në 6 ndeshje me histori të ngjashme. Erling Haland shënoi golin e 40 në Champions League në paraqitjen e tij të 35. Ai ka shënuar 12 gola kundër Lajpzig, për ta shndërruar skuadrën gjermane në prenë e tij të preferuar.

Barcelona triumfoi me vështirësi 2-1 ndaj Portos për të ruajtur kreun dhe kualifikuar më tej. Kanselo ishte më i miri në fushë, me një gol e një asist për të përmbysur avantazhit momental të portugezëve. Edhe grupi E ka mbyllur llogaritë një ndeshje para fundit. Atletiko Madrid dhe Lazio kualifikohen në Champions League, ndërsa Fejnordi garanton vendin në Europa League për të lënë jashtë Celtic.