Protesta e djeshme në autostradën Thumanë-Kashar/ “Terror për të frenuar reagimin qytetar”, deputetja e PD: Protestuesit u shoqëruan në komisariat pa shpjegime!

Dhjetëra banorë nga Kruja dhe Fushë Kruja protestuan pasditen e të hënës në segmentin e ri të autostradës Thumanë-Kashar, për shkak të bllokimit të akset të vjetër, duke pamundësuar kështu aksesimin e kësaj zone.

Banorët u përplasën edhe me policinë, ndërsa uniformat blu përdorën sprajt djegës për shpërndarjen e protestuesve.

Deputetja Andia Ulliri, ka deklaruar se disa nga protestuesit janë shoqëruar në komisariat pa dhënë asnjë shpjegim.

Në një postim në rrjetet sociale, ajo i ka bërë thirrje forcave të rendit, të distancohen nga ajo që e quajti arrestim i paligjshëm të banorëve të Fushë-Krujës dhe Krujës.

“Ky është një terror që duan të përhapin për të frenuar reagimin qytetar!”, shkruan ajo.

Postimi i plotë:

Ndodhem në hyrjen e Komisariatit në Fushë-Krujë ku janë shoqëruar disa banorë nga protesta pa dhënë shpjegime.
I kërkoj policisë të distancohen nga arrestimet e paligjshme të banorëve të Fushë-Krujës dhe Krujës.
Protesta ishte paqësore në kërkim të të drejtave të qytetarëve dhe nuk ka patur asnjë shkelje ligjore nga protestuesit.
Ky është një terror që duan të përhapin për të frenuar reagimin qytetar!
Kërkojmë ndërprerjen e çdo zbatimi të urdhërave politik ndaj popullit protestues
Protesta nuk ndalet!
Interesat e qytetarëve nuk shiten!

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb