“Qeveria ka braktisur fasonët”, Teliti: Garancia e re sovrane është e pavlerë

Këshilltari për Çështjet Ekonomike në PD, Dorjan Teliti, ka reaguar ndaj braktisjes që qeveria po vazhdon ti bëjë fasonëve, shqetësimin mbi falimentimet e tyre në masë dhe humbjet e dhjetëra mijëra vende pune.

Teliti denoncoi faktin se garancia e re sovrane është e pavlerë dhe do të ketë të njëjtin fat të atyre të ndërmarra në periudhën e Covid-19.

Reagimi i plotë:

Qeveria shpall kriteret e garancisë sovrane. Tashmë e sigurt: fasonët të braktisur dhe drejt FALIMENTIT.
Prej vitesh fasonët po vuajnë në masë prej taksave, detyrimeve dhe sidomos prej zhvlerësimit të ndjeshëm të euro-s.
Mbi 700 sipërmarrje prodhuese që operojnë në Shqipëri cdo ditë bëjnë vec dy gjëra, ose deklarojnë falimentin, ose në rastin më të mirë shkurtojnë vendet e punës, kryesisht gra kryefamiljare që me atë rrogë ushqejnë e arsimojnë fëmijët e tyre.
Pas vitesh heshtje dhe braktisje, qeveria më në fund doli me zë e me figurë dhe premtoi një paketë mbështetëse për fasonët, por ctë shohësh…zhgënjim dhe tallje.
Fakti: Asgjë nuk bëri, përvec se miratoi një garanci sovrane për të marrë borxhe mbi borxhe, e thënë ndryshe: zhytuni më thellë në gropën e borxheve.
Fakti: Sot që shohim edhe kriteret e miratuara të kësaj garancie sovrane, është e qartë si kristali, se edhe kjo garanci sovrane do ketë të njëjtin fat si ato garancitë sovrane të Covid-19, totalisht e pavlera për fasonët e ndershëm.
Mesa duket “verbërisë politike” që i ka zënë sytë drejtuesve politikë të qeverisë dhe bashkisë, të cilët “nuk shohin dot” ata që hanë “gjoja mbrapa krahëve” kumbulla, dardha e fiq, i është shtuar edhe “shurdhmëria politike” ndaj halleve reale të sektorit prodhues vendas.
Sot më shumë se kurrë nevojitet që qeveria të marrë propozimin tonë për mbështetje direkte financiare ndaj fasonëve dhe reduktim/shtyrje të pagesave të detyrimeve tatimore.
Është e vetmja mënyrë për ti thënë stop falimentit, stop humbjeve të vendeve të punës, stop braktisjes së prodhuesve shqiptare.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb