Ukraina feston Krishtlindjet e para më 25 dhjetor

Shumë të krishterë ortodoksë ukrainas po përgatiten të festojnë Krishtlindjet më 25 dhjetor për herë të parë këtë vit.

Ukraina ka përdorur tradicionalisht kalendarin Julian, i përdorur edhe nga Rusia, ku Krishtlindjet bien më 7 janar.

Por në një “zhvendosje të mëtejshme” nga Rusia, tani po shënojnë Krishtlindjet sipas kalendarit perëndimor – ose gregorian – të cilin e përdor në jetën e përditshme, shkruan BBC, përcjell Telegrafi.

Presidenti ukrainas Volodymyr Zelensky ndryshoi ligjin në korrik, duke thënë se u lejon ukrainasve të “braktisin trashëgiminë ruse” të festimit të Krishtlindjeve në janar.

Në një mesazh për Krishtlindje të lëshuar të dielën në mbrëmje, Zelensky tha se të gjithë ukrainasit tani janë bashkë.

“Ne të gjithë festojmë Krishtlindjet së bashku. Në të njëjtën datë, si një familje e madhe, si një komb, si një vend i bashkuar”.

Kisha Ortodokse e Ukrainës (OCU), një kishë e pavarur e sapokrijuar që mbajti shërbimin e saj të parë në 2019, ka ndryshuar gjithashtu datën e saj të Krishtlindjeve në 25 dhjetor.

Ajo u shkëput zyrtarisht nga kisha ortodokse ruse pas aneksimit të Krimesë nga Moska në vitin 2014 dhe mbështetjen e saj për separatistët në Ukrainën lindore. /Telegrafi/