Deputetët e Partisë Demokratike kanë bllokuar foltoren dhe karrigen e kryetares së Kuvendit mbrëmjen e kësaj të Enjteje, kjo pasi nuk morën 15 minuta pushim për të zhvilluar mbledhje e për të diskutuar lidhur me anëtarët e Komisionit të Reformës Zgjedhore.
Ishte Gazment Bardhi, në cilësinë e kreut të grupit parlamentar të PD-së ai i cili kërkoi ndërprerjen e diskutimeve. Një kërkesë e tillë u refuzua nga ana e nënkryetares së Kuvendit Ermonela Felaj.
Menjëherë pas këtij vendimi, deputetët demokratë nuk kanë lejuar Bledi Çuçin të marrë fjalën dhe kanë bllokuar foltoren dhe kryetarja e Kuvendit Lindita Nikolla u detyrua të mbyllë seancën.
Lindita Nikolla: Mbyllet seanca për sot, votimi do të bëhet në seancën e ardhshme. Natën e mirë!
Ndërkohë Bardhi deklaroi jashtë Kuvendit se mazhoranca po tenton të pengojë përfaqësimin e opozitës në Komisionin e Reformës Zgjedhore.
“Tentativa më e rëndë në 32 vite që mazhoranca ka kryer, prej muajsh mbahet një komision që kulmoi me vendim të marrë skutave. Dhe teatri i mëngjesit ishte pjesë e skenarit për të emruar opozitën PS në Komisionin e Reformës Zgjedhore. Ka një tentativë të qartë për të penguar përfaqësimin e opozitës në Komision për ta zvarritur finalizimin e reformës zgjedhore”, deklaroi Bardhi./tvklan.al
Të ngjashme