1 year ago
8
Serbia do të hetojë ngjarjet që çuan në një përleshje me armë në një manastir në veri të Kosovës, për të cilin Prishtina ka fajësuar Beogradin, tha të enjten presidenti Aleksandër Vuçiç për Reuters, duke mohuar çdo përfshirje të qeverisë në incident.
Policia e Kosovës luftoi me rreth 30 serbë të armatosur rëndë në manastirin ortodoks serb në fshatin Banjska për orë të tëra të dielën. Tre sulmues dhe një polic shqiptar i Kosovës u vranë në përleshje, shkruan media.
Ata shtojnë se rreth 50,000 serbë që jetojnë në veri të Kosovës, nuk i njohin institucionet e Prishtinës dhe e shohin Beogradin si kryeqytetin e tyre. Ata janë përplasur shpesh me policinë e Kosovës dhe paqeruajtësit ndërkombëtarë, por dhuna e fundjavës ishte më e keqja në vite.
Vuçiç i tha Reuters se Beogradi dënoi vrasjen e policit, duke shtuar se Serbia “do të nisë procedurat përpara organeve përkatëse gjyqësore” dhe do të hetojë të dyshuarit.
“Çfarë krimesh të dyshuara do të jenë këto, kjo është pyetja e prokurorit,” tha ai në zyrën e tij në Beograd.
Ai ka akuzuar policinë e Kosovës se ka qëlluar për vdekje në kokë njërin prej personave të armatosur “nga distanca prej një metër” pasi ai ishte dorëzuar, duke e përshkruar atë si një “ekzekutim”.
Veton Elshani, zëvendës komandant rajonal për veriun e Kosovës, tha për Reuters: “Kjo është marrëzi. Oficerët tanë nuk do ta bënin kurrë një gjë të tillë. Njërit prej të arrestuarve i dhamë ndihmën e parë në terren për t’i shpëtuar jetën pasi kishte pësuar lëndime.”
Asnjë grup nuk ka dalë të marrë përgjegjësinë për sulmin apo të shpjegojë motivet e personave të armatosur.
Vuçiç mohoi akuzat e Presidentes së Kosovës Vjosa Osmani se Beogradi kishte nxitur dhunën, duke thënë se Serbia nuk do të përfitonte prej saj pasi kjo do të rrezikonte pozicionin e saj në bisedimet e sponsorizuara nga BE-ja me Prishtinën.
“Pse kjo do të ishte e dobishme për Beogradin? Cila do të ishte ideja? Të shkatërrohet pozicioni ynë që kemi ndërtuar për një vit? Të shkatërrohet kjo brenda një dite? … Serbia nuk do luftë,” tha ai.
Në vitin 2012, Kosova dhe Serbia u angazhuan për bisedimet e sponsorizuara nga BE. Normalizimi i marrëdhënieve është kyç për të dy vendet për të përparuar në rrugën drejt integrimit në BE, shkruan media.
Vuçiç u zotua se Serbia do të hetojë origjinën e armëve të sekuestruara pas incidentit nga policia e Kosovës, e cila ka ekspozuar një depo duke përfshirë pushkë sulmi, mitralozë, raketahedhës antitank, granata dore, mina tokësore dhe drone.
Ai tha gjithashtu se Milan Radoiçiç, një nga politikanët serbë të Kosovës të rangut më të lartë, i cili, sipas autoriteteve në Prishtinë, ishte i pranishëm gjatë përleshjes me armë do të “thirret nga prokurori”.
Serbia e konsideron Kosovën si pjesë integrale të saj dhe, me mbështetjen e një numri vendesh, duke përfshirë anëtarët me veto të Këshillit të Sigurimit të Kombeve të Bashkuara, Rusinë, Kinën dhe pesë anëtarë të BE-së, refuzon të njohë pavarësinë e saj.
Vuçiç akuzoi kryeministrin e Kosovës Albin Kurti se dëshiron të dëbojë serbët nga Kosova dhe se ka ngecur një zgjidhje kompromisi të nevojshme për përmirësimin e lidhjeve midis Beogradit dhe Prishtinës.
“Shkaku i të gjitha problemeve në Kosovë është Albin Kurti. Është ai që i ka sjellë të gjitha këto”, tha ai.
Ai tha se refuzimi i Kurtit për të formuar një Asociacion të Komunave Serbe, një organ që sipas dispozitave të një marrëveshjeje të vitit 2013 midis Beogradit dhe Prishtinës do t’u siguronte serbëve të Kosovës më shumë autonomi, kishte nxitur tensione që çuan në dhunën në Banjska.
Kurti ka thënë vazhdimisht se një asociacion i tillë do t’u mundësonte rajoneve me shumicë serbe të shkëputen dhe t’i bashkohen Serbisë.
“Për ne pozicioni (në Kosovë) është qartësisht i frikshëm, por … ne duhet të jemi me njerëzit tanë, … (dhe) të përpiqemi të ruajmë paqen,” tha Vuçiç. “Zgjidhja është gjithmonë (në) dialog.“
Top Channel
English (US) ·