Zeqiri tregon çka po ndodh me grupet kriminale serbe që po financohen nga Serbia: Po kërkohen nga Policia e Kosovës

Situata në pjesën veriore të Kosovës vazhdon të jetë e tensionuar.

Provokimet, kërcënimet dhe sulmet që Serbia në vazhdimësi i realizon në këtë pjesë të vendit, vijnë nga grupet kriminale që ajo i udhëheq.

Grupet kriminale serbe janë një pjesë që institucionet e Kosovës po i lufton në vazhdimësi dhe tenton t’i shkatërrojë ato.

E për kërcënimet dhe sulmet e mundshme që shteti serb mund t’ia bëjë Kosovës foli kryetari i Zubin Potokut, Izmir Zeqiri, në një bashkëbisedim me “Bota sot”.

Së pari, ai tha se dihet tash e sa kohë çfarë synimesh ka Serbia ndaj Kosovës dhe përmes grupeve kriminale dëshiron ta destabilizojë situtatën në Kosovë.

Megjithatë, vlerëson se këto përpjekje do jenë të dështuara.

“Dihet se ky është një agresion që ka ndodhur gjatë gjitha dekadave të mëparshme, por edhe në kohët e fundit, më 24 shtator, e pamë se çfarë synimesh ka Serbia, dhe mund të ketë në qoftë se gjen akterë. Kjo ka bërë dhe do të bëjë përpjekje të investoj në grupe kriminale për t’i hapur problem Kosovës. Këtë e quaj si agresion të një shteti që po i bënë Kosovës dhe këtë e kam cilësuar gjithmonë kështu, pasi është agresion i hapur, mirëpo nuk besoj në sukseset e këtyre përpjekjeve, kështu që besoj që dita ditës po tkurren, zvogëlohen ato grupet kriminale”, tha kryetari i Zubin Potokut.

Gjithashtu, zvogëlimin e grupeve kriminale e ndërlidhi me punën e policisë sonë dhe beson që në vazhdim do shuhen këto grupe kriminale, gjë që ka filluar të ndodhë spas tij.

“Kjo pasi, një pjesë e madhe e tyre janë të kërkuar nga Policia e Kosovës, por edhe Interpoli me siguri për veprimtari kriminale.

Unë besoj që organet e sigurisë së Republikës së Kosovës do të arrijnë ta mbajnë rendin dhe qetësinë në gjithë territorin e vendit, ku dita-ditës do të shuhen këto grupe kriminale që po i financon Serbia.

Mirëpo, unë shoh një zvogëlim të grupacioneve dhe rënie të ndikimit të këtyre grupeve në territorin e Republikës së Kosovës”, përfundoi Izmir Zeqiri për “Bota sot”.